Parlamentario pa Partido di Pueblo Arubano (AVP) mr. drs. Richard Arends ta un di e miembronan di e comitiva cu a organisa e serie di sesionnan di brainstorm ‘Scucha, Pensa, Recupera Miho’ cu ta wordo hiba pa varios siman caba. Diahuebs ultimo a tene un di dos parti di ‘Turismo den Perspectiva’ enfoca riba turismo, recuperacion economico y e retonan den mercado laboral caminda a sinta cu representantenan di timeshare, hotel, sindicato y taxistanan. Arends ta convenci cu e encuentronan aki ta importante pa scucha for di esnan cu dia aden y dia afo ta biba y traha di turismo.
“E informacion nos a haya awe ta hopi balioso pa e proceso di scucha, pensa y recupera miho. Mi ta kere esaki sigur ta un bon comienso,” e politico a splica indicando cu durante historia di nos Paid, partido AVP mester a asumi responsabilidadnan den momentonan transcendental pa pone nos economia riba pia, manera cu nos conoce.
Pa Arends preparacion ta algo completamente normal pa un partido haci. Sea ta den oposicion of sosteniendo gobierno, bo no por ta limita na reacciona riba acontecimentonan diario. Naturalmente tin atencion pa e desaroyonan actual, pero tambe mester prepara y formula un vision riba termino largo. “Ta hopi sensato pa partidonan politico prepara nan mes y fiha un posicion, nan plan di maneho y plan di partido” Esaki ta loke el a haci como presidente di FESCA entre 2007 y 2009, preparando estudionan cu tabata e base pa e maneho di gobierno di Gabinete Mike Eman I y II.
Un biaha mas partido AVP ta asumi e responsabilidad di prepara su mes cabalmente pa fiha un posicion y presenta un cuadro di recomendacionan cu por sirbi como delineacion di un maneho coherente pa recuperacion di nos turismo di un manera sostenible y dunando atencion na e impacto laboral. Esnan cu ta traha den sector turistico ta e weso di lomba di nos pilar economico cu a sa di sostene nos entradanan. Atrabes di dialogonan aki ta yega na e dato y informacionnan necesario. Otro miembronan di e delegacion ta lider di AVP mr. Mike Eman, Jennifer Arends-Reyes, mr. Gerlien Croes y drs. Gervais ‘Rene’ Herde. Prome sesion algun luna atras tabata su sector di cuido medico riba crisis di COVID-19, mientras cu pa e proximo simannan lo cubri otro aspectonan manera enseñanza y husticia, entre otro.
