Na momento cu minister di husticia trata di splica y aclaria e incidente cu a tuma luga ora cu ministerio publico a usa militarnan den un investigacion penal, e ta bolbe confirma cu minister Bikker ta sigui riba un rumbo totalmente perdi.

Parlamentario Arthur Dowers ta mustra cu a bira masha normal cu  minister Andin Bikker ta dicidi di envolvi su mes ora cu cosnan a bay robes caba, tratando na hustifica un situacion cu no tin hustificacion.

Sigur ora cu e minister mes ta papia cu ta for di 1987 tin un acuerdo y palabracion cu autoridadnan hudicial di tanto Aruba, Corsou y Bonaire, caminda por haci apelacion riba militarnan pa nan wordo usa den casonan di investigacion penal si esaki ta rekeri e sosten aki.

“Sinembargo scuchando for di propio boca di minister Bikker ora cu el a  bin den comision di parlamento di husticia y bisa cu el a manda un ‘beleidsinstructies’ pa ministerio publico riba e particularidad aki, e ta confirma loke pueblo sa caba, esta cu minister Bikker ta un minister di husticia cu bachi cu dashi y nada mas.

Segun e minister, e incidente aki ta pa falta di comunicacion pero atrobe un cos asina ta pasa bou di su maneho, ya cu anteriormente  tipo di incidente aki no a yega di sosode y pa hustifica su fracaso como minister di husticia, e ta insisti cu no ta trata aki di un asunto asina serio mientras cu sin duda e ta un asunto sumamente delicado.

Tur investigacion penal mester wordo dirigi pa ministerio publico cu sosten di Cuerpo di Polis, no por ta otro y e solo hecho cu Bikker mes ta informa parlamento cu el a manda un ‘beleidsinstructie’ pa OM, ta mustra su falta di vision y falta di maneho totalmente.

Ta algo tristo pa señala cu despues di un aña y algun luna como minister, ainda ningun hende sa kico ta su vision, kico ta su maneho como minister y awor ta manda instruccion verbal pa un departamento pa despues e ta trata un carta oficial pa haci e instruccion aki algo oficial.

Bikker ainda no por a cumpli cu tur loke el a priminti cu e lo haci ora cu e bira minister di husticia, ya cu tanto su promesa di  instala camaranan di siguridad na tur cas, ainda no a wordo cumpli y a corto plaso no ta mustra cu esaki lo wordo realisa tampoco.

Na luga di carga su responsabilidad den un forma serio, Bikker a pasa varios luna hungando weganan politico, insinuando cu mi persona como ex minister di husticia, no a pasa ningun documento pa su persona, mientras cu debidamente el a haya tur cos cu e mester a haya.

Momento a yega pa Bikker bira serio y cuminsa cumpli cu pueblo, cumpli cu su promesa di reduci crimennan manera atraco y ladronicia, cosnan cu ta pasando practicamente tur dia sin cu e por haci algo contra di esaki,” Parlamentario Arthur Dowers a declara.