Un cantidad di conferencia di prensa a wordo yama pa gobierno y fraccionnan cu ta sostene gobierno caminda por a tuma noa cu e intencion tabata trata di dek cos cu Minister Marisol Lopez Tromp a pone na conocemento di pueblo diabierna ultimo.

Lider di fraccion di AVP, sr Marlion Sneek a mustra cu tur intento a wordo haci pa cambia rumbo di e acusacionnan cu a bin dilanti pa un Minister di gabinete Wever Coes,  canminda hasta ta wordo lubida cu e gobierno aki tin casi tres aña na mando.

“Ora cu nos tende politiconan di gobierno papia cu nan a bin haya herencia, nan ta lubida cu nan tin tres aña sinta riba e stoel ey caba.

No ta AVP a huur e edificio na Pos Chikito, no tga AVP a bay cumpra truck nobo mientras cu e trucknan cu tabatin ta bon bon, warda awo riba tereno na dump.

No ta AVP  a cera un deal na Cero Teishi cu amigonan pa coba cos, coba malo anto despues holo a cuminsa sali pero ta e Minister encarga cu Serlimar di e signatura Wever Croes y ta esun cu a tuma de decisionnan aki.

No ta gobierno di AVP a huur e edificio di Pos Chikito y es mas, colega Arthur Dowers a para dilanti di e edificio aki mas di un aña pas y bisa cu tin corupcion, cu tin bagamunderia.

Awe nos ta haya rason, ya cu manera e director nobo a wordo nombra, el a para e contract ya cu no mester di contract. 

Serlimar tin  un edificio di dje mes na San Nicolas anto ta bay usa un edificio nobo gastando placa di pueblo of miho bisa, hincando placa den saco di sponsor di partido y ta cosnan cu no ta aceptabel.

Pesey nos ta bisa y nos ta insisti cu loke e gabinete Wever Creos tin cu haci ta tene e honor na su mes y baha na awa y laga e pueblo aki hala roea di alivio.

Ta imposibel cu un gobierno cu a priminti pueblo tanto cos, ta haci awe net lo contrario di loke e mester a duna comunidad.

Diadomingo ora cu Minister di Husticia a yama un conferencia di prensa, nos a kere cu esaki lo ta pa anuncia su retiro luga e Minister aki a purba di defende algo cu e no por wordo defende.

Ta bon pa recorda kico e propio Minister aki tabata bisa antes como parlamentario, esta cu nos historia parlamentario ta deriva di esun di Hulanda y na Hulanda pa menos cu esaki, un Minister ta entrega su retiro.

Entrega bo retiro Minister di Husticia pasobra na e momentonan aki,  e Minister aki ta un Minister di Inhusticia,” lider di fraccion Marlon Sneek a declara.