‘Ta un bon momento pa refresca memoria di tur hende,” segun lider di fraccion di AVP, Marlon Sneek a trece dilanti durante conferencia di prensa, pa mustra cu Aruba ta conta awe c’un profeta den persona di Prome Minister Evelyn Wever-Croes.
Parlamentario Sneek a mustra mesora cu mester pone e accento si cu Evelyn ta e profeta di desaster, sigur despues di a mira un cantidad di grabacion cu a bay rond riba medionan social, caminda por a mira con na 2015 Wever-Croes a practicamente profetisa tur loke el a haci awe.
“Con el a entrega autonomia di e pais aki, con el a bay di acuerdo pa introduci un cantidad di medida riba nos pueblo, caminda tur hende por lesa e ‘landenpakketen’ den cual por mira bon cla diferente punto cu el a yega di anticipa.
Number un ta cu na 2015 Evelyn a bisa cu e cos aki mester tuma luga basa riba un Rijkswet of via di un KB y no via di un ‘Landsverordening’ cu ta un ley local y awe pueblo por wak cu Evelyn ta cumpli cu esaki.
Awe Aruba no a haya uno, sino dos Rijkswet; anto tur hende por mira con Evelyn ta trata di hunga cu inteligencia di e comunidad aki, bisando cu Aruba no tabatin su autonomia financiero bisando cu ya tabatin un ley di CAFT caba.
Un ley cu tur hende por corda con lider di AVP a bay guera cu Hulanda, ya cu e Rijkswet cu awe Evelyn Wever-Croes a acepta, tabata firma caba for di 2015, pero gobierno di AVP a bisa Hulanda cu absolutamente cu NO y cu gobierno di AVP lo bay haci’e un ley local. Cu na momento cu nos autoridadnan local, nos profesionalnan local, nos instancianan local, traha y yega caminda nos mester yega, Parlamento di Aruba mes lo ta esun cu ta dicidi cu esaki a yega na su final.
Awe Aruba tin Rijkswetnan cu ta bay conta pa riba shete aña y esun cu ta bay dicidi si e Rijkswetnan aki ta stop di existi, ta Hulanda y no Aruba y esey ta e diferencia ora bo ta entrega autonomia di e pais aki.
Awe tur hende por mira mesun profeta aki cu a papia, e tempo aya, di BTW y VAT di dos digito, awe por lesa den e Landenpakket con Evelyn a firma y bay di acuerdo cu ta ba elimina BBO y ta bay bin cu VAT di 12.5%.
Esey ta locual Aruba ta confrontando, con nos companianan publico ta bay ta bou scrutinio di Hulanda. Probablemente un Arubus of Postkantoor por conta cu ta bay tin probleman pa nan den futuro. Companianan cu a traha duro cu nan pa produci suficiente ingreso, pero nan por prepara pa doek op.
Pa loke ta servicionan, e Landsbesluit cu Wever-Croes a firma na Hulanda, y como tal Parlamento no tin nada mas di bisa, ta stipula cu AZV mester kita un cantidad di remedy for di ‘positievelijst’ y corta 5 miyon Florin pa luna. Esey ta loke e profeta di desaster a firma riba Friday the 13th, segun Sneek, entregando e poder di Parlamento den man di un organisacion na Hulanda.
Rapidamente, e mesun atardi despues di a firma Secretario di Estado Knops a manda un carta pa Tweede Kamer informandonan cu a firma cu Aruba. Aki e ta indica bon cla cu loke Aruba a fia caba riba mercado internacional, ta keda pafo di loke Hulanda ta bay prestanan. Kier men, den esencia, nada no a cambia entre loke Gobierno a nenga pa firma na juli, cu loke si a firma awo. E carta ta indica cu Aruba ta haya un maximo di 808 miyon, loke ta nifica cu e presupuesto supletorio cu Parlamento di Aruba a aproba siman pasa y cu MEP a haci tanto fanfaria cune, mester benta afo paso den wowo di Hulanda, e no ta conta mas.
Di mesun manera, e lista pa inversion pa 40 miyon Florin pa 2020, Hulanda a manda bisa cu e mester wordo argumenta y lo keda bou aprobacion di CFT.
“Kico cu nos kier haci, mester haya OK for di Hulanda; esey ta loke e profeta di disaster a hinca Aruba den dje. Esey ta e realidad cu MEP a hinca Aruba aden. Mira kico e subrina preferi ta haci cu e lucha di e libertad.
Mira con el a entrega e autonomia cu e pais aki a bringa p’e,” Sneek a bisa. Si no tabata pa e autonomia ey, nos no lo a conoce nunca e desaroyo coo pais Aruba y nos por mira nos bisinanan cu tin 10 ana, e diferencia cu tin; anto ta perde paso hendenan incapaz cu no por a sinta na un mesa y yega na un miho areglo.
E diferencia ta cu Gobierno na 2015 a priminti di lo cumpli y a pone pia abou pa bisa cu nos kier un Landverordening, y na November 2019 Evelyn Wever-Croes y Xiomara Maduro a firma un protocol pero no a cumpli lagando Parlamento cambia e ley di LAFT. E ora ey Hulanda a bisa: Mi no ta confiabo mas y mi ta bin cu mi Rijkswet. Mi ta bin tambe cu un organo cu cual mi ta bay controla stap voor stap y punto pa punto kico bo ta bay haci.
Y asina riba prome dia caba, nos ta wak con Parlamento ta perde su poder; esey ta e Aruba nobo cu e Gobierno aki a hinca nos pais aden.
