Tin un pobresa creciente den nos comunidad, hopi sufrimento serca famianan cu mi ta bishita, costo di bida ta birando impagabel pa miles di famia na Aruba. Esaki tabata e reaccion di ExPromer Minister y Lider di AVP, mr Mike Eman despues di a bishita Sra. Sonia Westerburger na Tarabana Dakota y scucha su clamor.
Sonia Westerburger (83) ta un señora grandi aprecia y respeta na Aruba. E ta un persona cu un fe grandi y ta lesa su bijbel tur dia pa fortifica su creencia y su mission como un bon ser humano riba e mundo aki. Sonia a pasa momentonan hopi dificil cu fayecimento di su jiu stima, Karin Jie- Sam Foek, na un edad hoben na man di e teribel malesa di cancer. Pero cu su fe y stimacion pa su jiunan, famia y amistad e a sigui lucha pa duna bida un contenido digno.
Den su cas humilde na Mamoticastraat por mira tur cos cu ta yena bida di Sonia: su rumannan, un di nan na bishita e momento ey Johannes Westerburger, 5 ainda ta na bida. Potretnan di su famia, majornan, jiunan y amistad y e lecturanan di su religion cu ta fortifica su proposito den bida, apesar di tur contratiempo. Su preferencia politico, su speranza pa un mihor mayan pa Aruba, tambe ta visibel na su cas cu potretnan y publicacion di Mike Eman y tambe di su antepasadonan. Sonia ta un di nos grandinan cu raiznan profundo den e comunidad Arubano cu awe ta sinti cu gobierno di su pais ta causando e y miles di otro hopi sufrimento.
Pesey Sonia Westerburger a dirigi su mes na esun cu e ta confia y e kere aden den politica pa por proteha esnan cu mester proteccion, ExPromer Minister Mike Eman. Sonia a comparti cune su dolor cu e costonan cu e ta worde confronta cune dor di tur e medidanan di gobierno. E ultimo sorpresa cu Sonia a haya, despues cu casi nada di dje ta resta na man di tur e medidanan, ta e aumento di 6% di BBO riba e seguro di su humilde cas cu e a traha henter su bida pa e por a bira donjo di dje. Tur e aumentonan aki ta causando hopi sufrimento serca Sonia y den Pueblo.
“No haci cu otro locual bo no kier pa nan haci cu bo”, esaki ta e promer cos cu a bin na mi mente despues di a bishita Sonia Westerburger, ExPromer Minister y Lider di AVP, mr. Mike Eman a expresa. E medidanan di gobierno ta birando un peso insoportable pa miles den nos comunidad y no tin hustificacion pa nan cu e gastonan cu bo ta mira riba e presupuesto di gobierno. E siman aki a sali publicacion cu ta prueba cu Ministernan ta biahando pa miyones di florin sin un meta y resultado cu ta hustifica e gastonan astronomico aki. Peor e dolor den pueblo ta bira ora mira cuanto famia di e gobernantenan a worde poni den gobierno, mr. Eman ta enfatisa.
Awor nos ta mira tambe cu envez cu nos a haya 7 minister manera a priminti en realidad nos tin 14
minister. No menos cu 6 ex Minister ta trahando cu e Gabinete Wever Croes: Nel Oduber, Hendrik Croes, Rudy Croes, Junior Croes, Edisson Briesen y Nilo Swaen. Con por hustifica e peso absurdo riba pueblo cu tanto previlegio pa un grupito ta locual henter Aruba ta puntra su mes awe.
ExPromer Minister Mike ta termina bisando cu e ultimo encuesta di Banco Central bao di consumidornan Arubano ta confirma e sentimientonan di dolor, malcontento y pesimismo cu e maneho di Gabinete Wever Croes ta creando. Pesey e ta crucial pa nos uni forza pa trece un cambio mas rapido posibel cu lo trece alivio pa Pueblo y un perspectiva positivo pa Aruba atrobe.
