| Diabierna 26 di juni a trata cambionan den nos Codigo Penal pa loke ta trata delitonan moral. A aproba cu lo hisa castigonan pa esnan cu comete abuso sexual y otro tipo di delitonan moral. Segun Wyatt-Ras den su discurso den Parlamento consecuencianan di abuso di menor ta devastador pa e victima. Entre otro miedo, angustia, rabia, odio, falta di confiansa, imagen propio abou, dissociacion, problemanan di conducta, diripente cambio di comportacion, nachtmerries, pishi na cama, pupu den carson, automutilacion. Na edad mas grandi posibilidad di adiccion, problemanan psychologico,depresion, bipolaridad, problemanan psychiatrico, agresividad y haci otronan danjo/comete actonan abusivo. Dor cu den mayoria caso(80%) ta trata di incest e victima ta ser confundi cu loyalidad. E hecho cu profesionalnan den sector social y nos pueblo ta haya cu castigonan den caso di abuso di menor mester aumenta no ta di awor.A base di e pensamento aki na anja 2003 ya a hisa castigonan pa delitonan moral y a introduci boet. Wyatt-Ras mes tabata co-iniciador di cambio di ley na fabor di victimanan di abuso sexual y maltrato. E tempo ey a bira posible pa duna keho despues cu e victima a bira mayor di edad. A bin prohibicion explicito riba comercio y posecion di porno di mucha art 247. A amplia castigo den caso di delitonan pisa, manera violacion y intento di violacion (aanranding). A bin proteccion pa personanan fuera di conciencia of bao influencia di alcohol of substancia of tin problema psychico of cognitivo. Penetracion di mucha bao 12 anja a haya maximo castigo di 12 anja y boet di max. 100.000 florin. Relacion sexual cu menor cu ta prostitui su curpa pero no a yega edad di 18 anja a bira castigable. Esnan cu presencia actonan sexual cu hoben pa placa ta haya castigo. Esnan cu ta traha cu menor of cu handicap y ta comete delitonan moral cu nan a hisa castigo di 6 anja y boet tambe inclui. A bin proteccion pa prostitutanan contra di abuso y a stipula boet maximo di Awg. 10.000. Violacion di hende muher den matrimonio a bira castigabel. Proteccion di mucha hombernan contra di abuso sexual a ser agrega. Paso antes mucha muhernan so tabata ser protehi. Tambe a bira castigable trafico di personanan pa prostitucion. Explotacion di mucha pa haci labor peligroso y danjino pasu salud a bira castigable. Stalking tambe pa promer biaha a bira castigabel. Segun Wyatt-Ras despues di pasa e ley aki e cantidad di casonan no a bira menos sino a sigui aumenta. Pa atende mihor cu victimanan a lanta buro SOSTENEMI na 2004 a base di raportnan y peticion di esnan cu ta traha den area social pa asina yega na un solo punto pa meld casonan, registra y pa por coordina e ayudo na un mihor forma. Na 2010 basa riba sucedidinan a lanta un comision extraordinario di Parlamento cu a traha un raport cu diferente recomendacionnan. Aki un biaha mas a senjala cu mester haci algo na leynan pa proteha victimanan. Na anja 2014 a aproba otro cambio di Codigo Penal y strafvordering. A pone tur e diferente cambionan necesario den e concepto di ley y a modernise un tiki mas. A introduci entre otro taakstraffen y e aspecto social di ayudo a ser fortifica pa preveni recidive. E tempo ey tambe a kita e klachtrecht esta cu mester duna un keho promer cu por persegui.Pues mas aspecto a ser mehora. Sin embargo malhechornan di tur forma tog ta logra di skapa ley y e consequencia ta pa victimanan. Na 2016 comision di Salud y Asuntonan Social, hunto cu comision di Justicia a base di un manifesto entrega na Parlamento dor di sr. Danies y sra. Gomez a haci un sondeo y a yama reunion cu ministernan den Parlamento pa atende cu diferente aspecto di ayudo y ley y a skirbi un raport al respecto cu diferente recomendacion. Gobierno anterior a inverti hopi den prevencion y e gobierno aki a bin cu un crisisplan despues cu tabatin un caso di 2 mucha cu a fayece a consecuencia di abuso y maltrato. Dicho crisisplan ta ensera36.8 miyon florin. A nombra 50 personal. Sin embargo e kehonan ta keda cu clientenen te ainda no ta haya suficiente ayudo y cu nan ta ser manda di cashi pa muraya. E keho di pueblo ta ainda cu castigonan mester aumenta y pesey nan lo bin Staten pa demostra di 3 di juli venidero. Esnan den gobierno awe tempo nan tabata parlamentario a priminti cu lo bin cu ley pa castigo minimo y cu lo pasa e ley den 6 minuut. Pero e promesa aki no a bira realidad. Segun gobierno e.o. a base di 33 caso na 2019 a dicidi di cambia e ley. Den e ley tambe ta regla cu e delito no ta verjaar es decir cu ki ora cu e victima ta desea e por duna keho. Aki ta amplia derechonan di e victima. E ley a ser aproba na un forma unanime. Segun Parlamentario Wyatt-Ras ta importante y necesario pa envolvi OM y hueznan den implementacion di e leye casonan aki ta depende di nan pa impone castigo of boet. Segun Wyatt-Ras e expectativa di victimanan ta halto pa cu aprobacion di cambio di nos Codigo Penalpa hisa castigonan. Sinembargo dicho cambio lo no sigura of garantisa cu abuso lo disminui. Importante ta pa traha alabes na foritifica e ayudo y tambe prevencion.Wyatt-Ras a menciona e “Youth Report” pa United Nations di juli 2019 ricibi na Parlamento dia 5 di mei 2020. A haci un sondeo den periodo di mei 2019 serca 456 hoben di 13 skol secundario. Mita, esta 54.5% a ricibi informacion encuanto derecho di mucha mientras cu 33% nunca a ricibi informacion di derecho di mucha. Pues por bisa cu e tin necesidad pa prevencion. Tambe e necesidad pa haci nos muchanan y hobennan “weerbaar” of fuerte pa por bisa no pa algo cu nan no ta sinti confortabel cun’e. Pa fortifica ayudo no solamente di abuso sino tambe di bullying, stalking y e fenomeno di “grooming” a entrega den nomber di fraccion di AVP un mocion pa por duna keho “online“y institui un loket online pa por atende cu e tipo di abusonan aki. Wyatt-Ras ta kere cu mester busca formanan pa proteha mucha y hobennan for di tipo di abusonan cu ta tuma lugar online. Dicho mocion a ser sosteni unanime dor di tur miembro presente. |
