E patronchi di incapacidad y falta di vision cu nos ta mirando actualmente caminda e caso ta mustra cu Minister Bikker den 10 luna ainda no por presenta un plan concreto pa husticia di con e ta bay soluciona e problema di ilegalidad, e problema di integracion, e maneho di asilo riba nos isla.
Parlamentario pa fraccion di AVP, sr Robert Candelaria a mustra cu loke ta pio ainda, tur dia e problema ta escalando y ta mirando y scuchando cu mas y mas autoridadnan ta garando ilegalnan na nos fronteranan y esaki ta un tendencia cu ta keda consistente semper, segun e parlamentario
“Cu Prome Minister mester a trece departamentonan hunto pa informa di e status di peticion di asilo politico via di un organisacion internacional, ta pa motibo cu e Minister di Husticia sea no ta compronde e materia of e no sa con e asunto aki ta hinca den otro.
Awor esaki ta duna e impresion cu durante e ultimo 10 luna di gobernacion, parce cu no a ni reuni riba e tema aki mientras cu Gobierno ta sigui bisa cu nan ta uno cu a bini pa resolve e problemanan cu Aruba tin. E retonan cu nos tin cu nos bisiñanan banda pazuid no ta algo nobo, algo andando di hopi tempo caba.
Bo ta asumi cu nan lo tabatin un plan caba con pa atende cu e problema aki, pues henter un maneho bruha cu Prome Minister mester a cay aden pa yuda resolve esaki, mustrando cu e Minister di Husticia no tabatin e situacion bou di control.”
Por a corda ainda cu ora a constata un entrada grandi di personanan den forma ilegal via di nos costanan, su prome reaccion tabata pa laga e militarnan tuma e situacion over.
E no a compronde e aspectonan legal ni operacional y a djis grita algo cu a bin den su mente e momentonan ey. Claramente por a nota e tempo ey el a laga polisnan y Cuerpo Policial cay y pa drecha su eror y basa tambe riba sugerencianan cu nos a haci, el a duna Polis e autoridad bek pa nan por para hende riba caya y puntra pa documentonan di estadia.
Awendia Polisnan ta gara mas y mas ilegal, specialmente durante controlnan cu nan ta tira na frontera, na accidente y durante control den trafico.
Pero na mes momento por mira cu awo tin un metemento increibel di consehero- y coordinadornan di Ministernan, cu ta yama Guarda Nos Costa y bisa nan pa laga ilegalnan bay. Na Hulandes nan ta bisa esaki “dweilen met de kraan open”.
Con bo por traha di e forma aki y nan mes ta combatiendo nan mes y por a tuma nota cu conseheronan di Minister ta cambia pen constantemente. Un rato un por ta consehero, despues ta kita e petchi ey y bisti esun di abogado, y tin biaha bisti petchi di comeciante pa yuda e ilegal drecha su papelnan pa e haya e status di legal na Aruba. Tur den nomber di Minister.
Tin casonan aki concreto di conflicto di interes entre mesun abogado y consehero di Minister pero hecho ta cu e mandatario mes no tin niun idea di kico ta pasando den su Ministerio.
Tur esaki mientras cu Cuerpo Policial y Ministerio Publico ta reglando e mesun di incertidumbre di falta di vision concreto y tumamento di decision ad hoc, decision pa loco.
Esaki ta lanta e pregunta; Kico e Minister tabata haciendo tur e tempo anto. E ta domina of compronde su materia,?” Parlamentario pa fraccion di AVP, Robert Canelaria a mustra.
