Den conferencia di prensa di partido AVP diaranson mainta, miemro di fraccion den Parlamento, Benny Sevinger no solamente a mustra riba e falta di contenido di e discurso di Gobernado den nomber di gobierno, pero tambe otro desaroyonan cu tin di haber cu e Rijkswet cu lo wordo trata diabierna den Conseho di Minister di Reino.
Na mes momento Parlamentario Sevinger a mustra riba e posicion cu gremionan comercial a mustra relaciona cu e acuerdo aki pa haya placa for di Hulanda, caminda por spera decisionnan cu lo bay ta mucho popular pa pueblo pero su sigur tambe lo wordo sinti formalmente pa gremionan comercial.
“Gremionan comercial, tanto AHATA, Camara di Comercio, tur a manda carta caminda nan ta sostene Prome Minister pa acepta e dos Rijkswet pa asina por fia placa di Hulanda pa por sigui paga salario di trahadonan.
Mi por compronde e posicion di gremionan pero nos mester ta duidelijk riba e punto aki, pasobra Aruba ta fiando placa cu mester paga bek pero ta duna autorisacion na tres persona cu ta bay dirigi e pais aki den e proximo añanan, kendenan lo bay tuma medidanan cu gabinete Wever Croes practicamente 50% tabata di bay ehecuta caba pero ta bin 50% adicional, medidanan nobo, cu Hulanda ta bay introduci.
Y ora cu belasting cuminsa subi pa hotelnan, pa comercio, caminda BBO ta bira BTW di 12.5%, bendemento di nos industrianan manera WEB, manera Setar, manera Elmar, no yora señores pasobra si boso no para awo y no ta mira cu Hulanda ta probechando di un posicion asina debil di pais Aruba, di un gobierno caotico, di un lider cu no por trece un union ni den su partido MEP, ni den conseho di Minister y ni den Parlamento, ta probecha di un situacion cu nos ta lomba contra muraya.
Pues ora cu e medidanan aki bin, pasobra covid ta bay pasa otro aña, e medidanan ta bay drenta na vigor, pa nos paga Hulanda bek, gremionan no mester bin bisa cu ‘cost of doing business’ a subi, cu nan no por mas, pasobra bo a gana placa hopi aña riba e pais aki anto den e prome luna caba di covid, a Sali bisa cu no por paga trahado y pa gobierno bay paga nan.
Esey mester ta duidelijk pa nos comunidad tambe sa di e desaroyonan aki,” Parlamentario Benny Sevinger a mustra.