Lider di partido AVP, mr Mike Eman a haci otro revelacion di cifranan cu Gabinete Wever Croes ta ignorando cu nan mes a causa. Eman ta referi na un inflacion grandi cu a tuma lugar na 2018 y 2019 mientras cu na 2017 no tabata tin inflacion.

Eman ta presenta un grafico di Banco Central mes cu ta mustra bon cla cu Gabinete Wever no por keda sconde mas cu nan a causa e inflacion cu ta haciendo henter Aruba pober. “E linea di nos gobierno 2017 (blauw) ta core stabiel practicamente sin inflacion. Na 2018 y 2019 nos a haya e explosion den inflacion y perdida penoso di costo di bida”.

“Gobierno y esunnan cu ta sostene Gobierno y ta creando e pobresa aki no ta mustra ningun comprension pa e dolor cu nan ta creando den pueblo. Atrobe, no ta Mike Eman ta bisa esaki ni AVP, pero ta Oficina Central di Estadistica (CBS) y CBA ta bisando kico ta pasando cu e poder di compra di nos ciudadanonan cu na e momentonan aki ta trancando Aruba su economia. 

E inflacion aki ta afectando severamente e poder di compra di nos ciudadanonan y poco poco un empobrecimento hopi grave den nos comunidad.”

E cifranan di CBS ta indica cu e inflacion di Aruba den dos anja ta bayendo direccion di dobel cifra. Esaki debi na e impacto di e pakete di medidanan cu a wordo introduci na 2018 y 2019. E cifra nan aki, Eman ta bisa, ta mustra con alarmante e situacion ta. 

Locual tambe ta hopi bisto ta e diferencia entre 2017 sin inflacion y na 2018 y 2019 un inflacion feroz. Hopi di nos hendenan ta experiencia un inflacion actualmente cu ta core rond di 20% den cuminda y di gastonan y transporte. 

Esaki ta e realidad cu nos hendenan ta confrontando y esaki ta cifranan cu nos no ta tende e gobernantenan ta papia di dje. Nan ta tene conferencia di prensa pero nos no ta tende di e cifranan di CBA ni di CBS y e pobresa cu nan ta causando,” lider di AVP mr Mike Eman a mustra.