Durante reunion publico Gobierno a presenta un presupuesto cu a contene 14 miyon di florin na gastonan adicional cu no tabata presupuesta inicialmente. E gastonan adicional aki ta wordo cubri door di entradanan incidental y dividendonan cu lo no materialisa nan mes prome cu fin di aña. CAFT y Raad van Advies a indica cu Gobierno no ta cumpliendo cu e palabracionnan haci den e protocol 2018. “Ainda e presupuesto supletorio aproba mester wordo scrutina door di e Colegio di Supervision Financiero,” Parlamentario Richard Arends (AVP) a splica. “Nos no sa ainda kico e colegio aki lo conseha.”

Den e protocol 2018 Gobierno a palabra cu gastonan adicional mester wordo cubri door di reduccion di otro gastonan y entradanan adicional mester wordo aloca 100% pa reduccion di deficit y eventualmente reduccion di debe. Ademas di esey gastonan y entradanan incidental mester wordo separa estrictamente di esunnan structural. “Gobierno a bisa cu no por cumpli cu e reglanan aki pasobra no tin cuentanan anual, pero te dia di awe Gobierno no a presenta ningun.”

“Na su salida e gabinete actual a compromente su mes di no usa entradanan incidental nunca mas. Sinembargo Loke nos por a mira ta cu e deficit a wordo cubri cu entradanan incidental y e crisisheffing pa dos aña consecutivo,” Sr. Arends a declara. “Gobierno a splica CAFT cu dos siman prome cu fin di aña no por haci mucho pa cumpli cu e reglanan presupuestario cu a wordo palabra cu Hulanda. Sinembargo for di mita di aña e riesgonan aki tabata conoci y Gobierno a haci net nada.”

“Si bo sigui e palabracionnan haci, e deficit mester ta 14 miyon di florin mas halto cu loke tin den e presupuesto y segun e ley di supervision lo mester compensa esaki otro aña,” Sr. Arends a bisa. “Pero pa loke ta trata presupuesto 2020 Gobierno no a duna niun informacion riba loke ta spera e ciudadano y comercio na gastonan y medidanan. Tin un proposicion pa cambia 14 ley y ainda nada a yega Parlamento.”