Porfin Parlamento, dos siman mas laat cu ley di supervision financiero ta prescribi, a ricibi e informe di resultadonan di e di tres kwartaal 2017. Sinembargo ainda tin hopi falta di transparencia como tambe esfuersonan pa fortifica rol di Parlamento , ya cu memorandum financiero-economico ta circulando rond cerca institutonan cu no tin ningun tarea constitucional.
Parlamentario sr Richard Arends ta mustra cu ta net e dos puntonan aki, e gobierno di coalicion actual a propaganda cune den campaña y no por mira nada esaki y ta keda na promesanan envano ya cu esakinan no ta tumando luga.
“Loke a hala nos atencion den e reaccion di CAFT riba e ultimo kwartaal di 2017, ta nan comentario riba a pone riba e status di presupuesto 2018 y e ‘Financieel Economisch Memorandum,’ caminda nan ta bisa cu nan mester di mas informacion riba e medidanan cu lo ser tuma prome cu nan duna nan conseho.
Ta un nota sumamente preocupante ya cu e comentario breve aki ta e unico cos cu nos a haya tocante e FEM. No solamente e ta papia di medidanan, pero no ta elabora mucho riba con Loke nos por a tuma nota cu poco poco gobierno nobo di coalicion, ta entregando su poder constitucional na CAFT.
CAFT su rol ta pafo di e proceso legislativo, ya cu e tin un rol prome cu e concepto di ley bay Raad van Advies, y despues cu Parlamento haci su trabou di aproba e ley aki como ley.
CAFT no tin tarea pa conseha riba maneho, su rol meramente ta pa supervisa si gobierno a logra di cumpli cu normanan presupuestario cu nos a pone segun ley.
Coleganan den Parlamento ta cuestiona Gabinete Mike Eman II con nos a logra yega na e normanan, ta muestra un biaha mas di un falta di conocemento, y un confirmacion cu nan ta desconoci con e cuadro legal den cual CAFT ta funciona aden y ta hinca den otro.
Contenido di un maneho financiero, pues con ta yega na e normanan, ta un tarea exclusivo di Gobierno, CAFT ta un colegio di consulta y nan trabao ta solamente pa supervisa si gobierno a yega na e normanan si of no.
Loke nos ta wak aworaki, ta un gobierno cu durante di henter campaña a bisa cu nan tin e solucionnan financiero pa tur e retonan, pero nos a tuma nota cu nan ta dunando espacio na un colegio di consulta, duna su veredicto riba e maneho maneho financiero cu Gobierno mester hiba poniendo asina e minister encarga cu Finansa Publico un banda..
Nos ta hopi leu for di cas, pasobra di e manera aki gobierno ta confirma su falta di conocemento y experiencia den e materia ya cu ta duna CAFT algo di bisa den algo cu no ta coresponde nan y ta laga CAFT sinta riba stoel di gobierno.
Mescos cu nos ta critico riba gobierno, nos ta critico tambe riba CAFT.
Mi no ta kere cu esaki ta ni e cuadro legal cu CAFT den cual e tin cu funciona, e no ta corecto y gobierno ta habriendo un porta cu despues no por cera mas.”
