Manera tabata di spera y manera ta su custumber y sistema, Minister Oduber a activa cu grupo di sostenedonan, pa ataca y critica miembronan di fraccion di AVP, despues cu a expone e gañamento di e Minister aki na pueblo.
Esaki Parlamentario Arthur Dowers ta mustra relaciona cu e ultimo desaroyonan cu a surgi despues cu Minister Oduber a bin Parlamento cu su weganan politico di custumber, pa asina e logra su meta cu el a fiha pa su persona y no pa sirbi e interes general.
Dowers a sigui mustra cu no ta prome biaha cu esaki ta sosode ya cu den ultimo aña y mei caba Minister Oduber a uza mesun sistema aki ora cu el a dicidi di bandona fila di AVP y a bay den atake frontal contra su ex coleganan di partido, y tambe a haci mesun cos contra tur hende cu tabata opone su pensamento politico of tin critica riba loke e ta haci of pensa.
E forma di procede aki ta masha conoci cerca Minister Oduber, caminda Parlamentario Dowers a mustra cu den su tempo den partido AVP tambe el a haci mesun cos y ta pidi su hendenan pa bay radio y bay riba medionan di comunicacion social, ta pidi pa nan cambia nan stem y haci como si fuera cu su persona no tin nada di haber cu e atakenan baho aki.
“Esaki ta su style, ta su forma di pensa y ta su forma di procede y loke nos a mira awor cu despues cu nos a logra na desenmascara su maniobra pa haya mas fondo pa su ministerio, el a hasta manda miembronan di e fraccionnan den Parlamento cu ta sostene Gobierno, pa nan ataca tanto colega Parlamentario Benny Sevinger y mi persona,” Parlamentario Dowers a trece dilanti.
El a sigui mustra cu ta na su luga pa coregi algun punto despues di a mira cu e Minister aki, despues cu el a haya palo den Parlamento y a mara su man cu su propio mocion, ora cu el a purba tira santo den wowo di pueblo y un di e mentiranan aki ta cu esunnan cu a duna placa pa contruccion di Green Corridor, lo a duna gobierno te cu dia 14 di februari pa yega na un solucion.
Arthur Dowers a mustra cu esaki absolutamente ta algo ridiculo ya cu gobierno no tin nada di haber cu esunnan cu a fia placa, ya cu gobierno no a fia placa cerca ningun hende y ningun hende por pone gobierno bou presion pa yega na cualkier solucion.
Esunnan cu a fia placa ta e compania encarga cu construccion di e proyecto y kende ta responsabel pa e proyecto aki te na e momentonan aki.
E miembro di Parlamento pa fraccion di AVP a indica cu tin suficiente documento, caminda entre otro ta papia di Deutsche Bank y otro ‘lenders’ envolvi den financiamento di e proyecto pero tur esakinan tin acuerdo cu e compania cu ta ehecutando e proyecto aki y no cu gobierno di Aruba.
Sinembargo Minister Oduber kier pinta un scenario cu e mes ta bon na altura di dje cu no ta asina ya cu su persona mes como Minister di Gabinete Mike Eman II a sostene y aproba e proyecto di PPP aki Parlamentario Dowers a mustra .