Algun luna atras tanto Conseho di Minister di Reino como CAFT a duna aprobacion pa presupuesto 2018 di pais Aruba, cu e promesa di Gobierno cu lo corta un suma cuantioso e aña aki ainda den gasto di personal. Ademas lo mester a bin un cuadro financiero nobo y yega na palabracionnan nobo cu Hulanda pa loke ta trata e normanan. E conseho di CAFT riba presupuesto supletorio 2018 ta bisa enfaticamente cu Gobierno no a cumpli cu e palabraciona nan hasi. “Gastonan di personal a sigui subi enbes di baha manera cu a wordo palabra cu Hulanda y entradanan incidental ta wordo usa pa financia mas gasto,” Parlamentario Sr. Richard Arends, miembro di fraccion di AVP a declara. Ley di supervision financiero no ta permiti CAFT sinta riba stoel di Gobierno ni di Parlamento. CAFT ta simplemente urgi Gobierno pa mantene nan mes na promesanan cu Gobierno mes a hasi encuanto reduccion di personal y e cuadro financiero cu Gobierno mes a presenta.
“Nos a bin ta alerta e desaroyo aki durante e ultimo lunanan y fraccion di AVP di manera constructivo a presenta un nota unda ta indica e aumentonan di gasto na aña 2018 compara cu realisacion di 2017,” Sr. Richard Arends a declara. “Den su conseho CAFT ta confirma cu e gobierno a gasta casi 100 miyon mas cu aña 2017.”
Gobierno a presenta 7 punto cu lo a conduci na reduccion di gastonan di personal pa aña 2018. E plan aki a consisti di e.o. mantene un vacature stop; lo no renoba contractnan cu ta finalisa; lo elimina e aumento automatico di periodiek; lo reduci overtime; lo stimula VUT; lo elimina overtolligheidsoel. “Nos a remarka e tempo ey cu e 7 puntonan aki no ta suficiente pa logra reduci e gasto di personal desea”, Sr. Arends a splika a base di su experiencia. “Awor nos ta wak cu e gastonan di personal a subi enbes di baha.”
E parlamentario semper tabata hopi critico riba di e cuadro financiero presenta door di Gobierno. “Te dia di awe no tin un acuerdo riba e normanan nobo,” e la bisa y a indica cu e‘crisisheffing’ nunca tabata destina nunca pa reduccion di deficit ni di debe, sino pa financia maneho nobo riba lomba di ciudadanonan y empresanan. “Awor despues cu a presenta e FEM, Gobierno kier oportunidad pa corregi erornan cu nan a wordo alerta riba dje, e.o. cu entradanan adicional mester bay enteramente pa reduci deficit y debe, ” segun Parlamentario Arends
Despues di no a determina e saldo pa aña 2016 y consecuentemente esun di 2017 y añanan siguiente, como tambe keda sin cumpli cu palabracionan hasi Gobierno deliberadamente ta strobando e proceso di supervision financiero. Den menos di un luna Gobierno mester corta 26 miyon di presupuesto 2018. “CAFT no ta impone nada riba Gobierno, nan ta djies urgi Gobierno parespeta e palabracionan pa por sigui cu e proceso di stabilisacion di finanzas publico cu ta andando di 2014,” segun Parlamentario Arends. “E contenido di e conseho ta confirma un biaha mas e falta di confiansa den e maneho financiero-economico cu ta wordo hiba.”
