Scuchando e declaracionan di Secretario di Estado Knops despues di a atende e reunion di Conseho di Minister di Reino, no por saca otro conclusion cu e ‘Financieel Economisch Memorandum’ cu gobierno a presenta no ta sirbi y mester mester trahe di nobo, Parlamentario di fraccion di AVP, Richad Arends a señala.

Gobierno di Aruba mester bin c’un  plan di accion nobo pa por yega na entre un -3%  di dificit e aña aki y den dos aña na un surplus di 0.5%.

“Si tuma nota di e Financieel Economisch Memorandum 2018-2021 manera cu el a wordo presenta, ta mustra un aumento structural di 4% den gasto di personal pa proximo cuater añanan y 11% pa loke ta trata gastonan di operacion y gastonan coriente di gobierno.

E Financieel Economisch Memorandum cu gobierno a presenta ta aumenta e debe riba 300 miyon florin mas y un surpluis ta wordo premira te despues di 2021.

Conseho di Minister di Reino no a bay di acuerdo cu esaki y a exigi gobierno  di Aruba pa yega na un 0.5% den dos aña. Esaki ta nifica cu mester cubri un espacio di 175 miyon florin di pa 2020.

Mester señala cu prespuesto di aña 2020 mester wordo presenta dia 1 september 2019, esta otro aña caba, na Parlamento. E Parlamentario ta bisa di ta spera cu Gobierno cumpli cu e fechanan aki mirando cu ja caba Gobierno ta laat den entrega e cuenta anual di aña 2018 na Rekenkamer.

Parlamentario Richard Arends ta ilustra cu 175 miyon florin ta ekivalente na un aumento adicional di BBO di 3% of reduci gasto di personal cu 1/3 parti pa por cubri e espacio aki cu ta e diferencia entre e dificit di -3% y e surplus di 0.5%.

For di dia cu e Gobierno nobo a sinta nos ta nota un falta di pro-actividad, un falta di conocemento di materia, pero tambe falta di un maneho economico. Esaki ta wordo refleha tambe cu den e hecho cu Gobierno di Hulanda mester a interveni y sinta hunto cu Aruba pa yega na un  plan di accion y un cuadro financiero nobo caminda den dos aña mester yega na un surplus di 0.5%.

Nos ta lamenta esaki pa motibo cu esunnan cu ta den gobierno actualmente mayoria di nan tabata den oposicion pa ocho aña, te ainda Parlamento no a ricibi un programa di gobernacion, pues te ainda tur decision cu ta wordo tuma ta decisionnan ad hoc y tambe nos por a tumja nota di esaki dor di cantidad enorme di mocion di fraccionnan cu ta sostene gobierno, a entrega durante tratamento di presupuesto.

Nos ta spera cu den dos siman di tempo e plan di accion nobo lo ta conoci y ta spera cu den cuadro di transparencia Parlamento por haya esaki tambe pa por duna nos opinion riba esaki,” Parlamentario Richard Arends a finalisa bisando