ExPromer Minister mr. Mike Eman, e persona cu mas voto riba su nomber desde cu el a drenta arena politico, riba peticion insistente di masha hopi hende preocupa, un bes mas a expresa su inkietud pa loke ta sosodiendo na Aruba y rond mundo pa loke ta e COVID-19 y loke esaki ta trece cu ne despues cu e pandemia aki pasa bay. Aruba, un isla cu ta depende grandemente di turismo ta bayendo cu pasonan gigantesco atras riba tereno financiero, economico y social. Nos ta para na rand di un abismo y hunto mester busca e solucion.
“E situacion cu nos ta den ta un desaroyo sumamente preocupante. E aumento a base diario di patientnan infecta cu Corona virus ta algo cu mester para keto na ne. Aruba, un isla chikito y vulnerabel ta den e top 13 di mundo cu Corona-vrus pa loke ta e poblacion cu nos tin. “Esaki sigur ta un motibo pa ta hopi preocupa”. ExPromer Minister, mr Mike Eman a papia tambe riba e junk status cu Fitch Ratings a manda nos isla aki linea recta aden. “E ultimo 24 ora a drenta e noticia cu Fitch Ratings, e instancia cu ta husga e finanzas publico di Aruba, caminda semper nos tabatin un rating halto y reconoci den mundo, a downgrade Aruba pa BB- cu ta haci casi imposibel pa Aruba haya fiansa riba mercado internacional na e momentonan aki.”
“Nos ta para na un situacion caminda 25 mil tata y mama di famia na e momentonan aki no tin entrada. Sea nan a cay den e categoria di ‘no work, no pay’ (a wordo manda cas por lo pronto sin entrada), of nan a haya vakantie forsa of nan a haya retiro. Na e momentonan aki esaki ta e realidad. 25 mil mama y tata di famia sin entrada y consecuentemente sin por paga nan obligacionnan. Nos gobernacion ta den un situacion sumamente urgente. Aruba ta confrontando un situacion nunca bisto. un situacion di reto sumamente grandi. Pa salud di nos hendenan y na e momentonan aki nos curazon ta cu tur e 92 y pico pashentnan y nos ta resa pa nan y pa esnan den hospital di cual tres den ICU. Esaki ta un refleho di e gravedad di e situacion.”
Practicamente tur negoshi na Aruba ta sera y perspecitiva pa futuro ta hopi scur sin un esfuerzo nacional pa delinea y carga nos caminda di recuperacion, ExPromer Minister Mike Eman ta expresa. Economia ta na suela, pueblo ta den nececidad grandi y e gobierno instabiel y marginal cu nos tin no tin e credibilidad y tampoco e capacidad pa convence Reino pa ta nos partner na e momento di nececidad grandi aki.
Tin hamber pa cuminda, pero tambe hamber pa seguridad, hamber pa perspectiva y hamber enorme pa sa con e futuro ta bay ta. Ora mi mira con integrantenan y sostenedornan di gobierno ta ataca ciudadanonan cu ta sclama hamber cu tin den nan bario e ora mas bisto e ta bira con isola e gobernantenan previligia aki y nan famia ta di e dolor di Pueblo. Nos comunidad no ta bai accepta esaki y cu nan rason, ExPromer Minister Mike Eman a expresa. Nos lo ta para hunto cu nan y tur cu ta sufri di e negligencia y abuso di e gobernantenan previlegia aki.
