Rene Herde di partido AVP a mustra na nomber di su partido, preocupacion grandi pa e forma cu gobernacion ta bayendo caminda den apenas 8 luna, tin un sin fin di preocupacion riba gobernacion, funcionamento di parlamento, intimidacion y persecucion cu ta increibel y partido AVP como vocero di pueblo, lo no keda nunca sin denuncia e tipo di desaroyonan aki den defensa di democracia y di pueblo di Aruba.
E di e puntonan cu Rene Herde a trece dilanti ta e tema central cu tin na e momentonan aki, cu riba kico a cambia for di luna di october di aña pasa, esta kico a cambia y e unico cos cu a cambia cu ta significante pa desaroyo di nos pais, ta e gobierno.
“Aruba tabata den desaroyo, un desaroyo economico tin biaha poco poco y dificil, añanan largo a lucha pa lanta turismo y pa habri refineria pero nos por a wak un grafico con Aruba a logra di sali for di un abismo di menos 13% pa un crecemento economico.
Turismo cu ta e pilar principal, a crece aña pasa y pronostico pa e aña aki ta indica cu e lo crece cu e lo bolbe crece cu 4.4%. Desempleo cu tabata na 12% a baha y no tin ningun indicacion cu lo tin cambio drastico a corto plaso.
Inversionnan den un pais, cu ta esencial pa desaroyo economico y financiero, nos por mira cu inversionnan den sector publico ta continua y inversion den sector priva, ta continuando.
Kiermen tur indicador di un desaroyo of di un crisis, no ta cuadra c’un crisis ya c’un crisis ta ora bo sistema economico, financiero, social, hudicial, enseñansa y salubridad pega, ora cu e no ta funciona mas, ora cu servicionan pega, ora cu inversionnan pega, ora cu desaroyo pega ora cu inversionnan cay, e ora por papia di crisis.
Sinembargo gobierno MEPPORRED a declara for di momento cu nan a drenta, cu nos pais ta den crisis pero tur indicador standard di economia di desaroyo, ta mustra lo contrario.
E logica di gobierno aki su pensamento ta cu nan ta crea un esfera di crisis y dor di esey pueblo ta bay acepta e medidanan cu nan a tuma. Medidanan cu ta esunnan mas pisa den historia di nos pais, loke ta accijns, aumenta BBO, aumenta BAZV, hunto cu desaroyonan internacional di inflacion grandi cu lo conduci na aumento di prijsnan di productonan basico.
Un combinacion cu nunca prome Aruba a conoce mientras cu tur indicador di desaroyo economico y desaroyo general ta mustra otro.
Esaki no ta nifica cu no tabatin problema, ya cu ocho aña largo tabatin problema, tabatin problema di infrastructura pa cual a haci inversionnan grandi, tabatin problema di inversion pesey a haci e desaroyonan pa haci inversionnan grandi.
Tabatin problemanan financiero, tur hende por corda con e deficit a cay, baha y keda baha tur aña dor di austeridad y dor di inversion pa e economia crece, no tabata facil, no tabatin problema pero si tabatin un maneho riba tur tereno pa percura pa e situacion cu tabatin na 2008 no continua.
Un situacion na 2008 caminda economia a cay, desempleo a aumenta te na 12%, entradanan di gobierno a cay enormemente, refineria a cera , Banco Central a describi con economia y turismo en special a cay. Aworaki nan no ta den caida, nan ta den crecemento tin biaha chikito pero nan t’ey y tur indicador di crisis ta contrario na loke gobierno ta bisa.
No cu no tin problema pero e problemanan cu t’ey financiero of riba otro tereno, ta rekeri maneho a largo plaso y maneho diario y ta esey nos falta awor y esey no tin.
Den ausencia di un maneho adecuado y cu grito di un crisis, esfera di un crisis crea pa tur cos, entre otro morto lamentabel di dos criatura inocente cu a wordo cataloga como crisis y cu lo ta culpa di AVP, tin problema grandi na Venezuela caminda fruta cu berdura no ta drenta mas, ta un crisis segun gobierno aki, no un problema di maneho pero mesora e ta un crisis.
E ta un forma cu gobierno ta purba tapa tur cos cu e palabra crisis, e creacion di esfera di crisis pa hustifica medida y pa pueblo acepta esaki.
Ocho aña largo tabatin hopi problema pero nunca a scucha crisis, al contrario a scucha e optimismo na tur momento di desaroyo y esey a crea e esfera cu a conduci na e desaroyo cu a saca nos pais for di e crisis.
Ta nifica cu tanten nos como pueblo sigui kere den loke MEPPORRED ta sigui bisa, nos lo acepta tambe e medidanan contrario na para y bisa nan pa mustra nos unda e desaroyo ta, mustra unda kico ta haci cu inversionnan, mustra nos ki maneho gobierno tin riba tereno economico, tereno financiero, tereno social, no djis bisa pueblo cu tin un crisis y culpa otro hende pero mustra pueblo unda e crisis ta pa e ora pueblo husga e maneho gobierno.
Sinembargo for di luna di october di aña pasa, ainda gobierno no a presenta su plan di maneho na pueblo y ta sigui papia di crisis y tur cos ta indica cu e maneho principal na e momentonan aki, ta di tuma medida contra pueblo,” sr Rene Herde di partido AVP ta mustra.
