Segun Parlamentario Jennifer Arends-Reyes den cuadro di dia internacional di maestro, ta bon pa gradici cada un maestro na Aruba pa e gran trabou cu nan ta eherciendo na beneficio di nos muchanan y hubentud. Tanto maestronan y esnan cu ta traha den Enseñansa a experiencia e tres añanan cu a pasa di gobernacion di Mep-Por-Red uno sumamente turbulento y cu no ta laga recuerdonan mucho agradabel pa nan. Maestronan manera nunca antes a haña nan ta manifesta y bin dilanti pa lucha pa nan derechonan y di alumnonan cada biaha. Tanto pa seguridad na scol, tanto pa nan seguridad di trabou, tanto pa nan salario y pone nan den un posicion di desventaha si kier yuda colabora cu middag of avond onderwijs. A corta den e maximo cantidad di oranan cu ta ser paga mientras cu e trabou no a bira menos, tampoco tin dianan special dedica na maestronan cu reconocimento pa e gran trabou cu nan ta hasi. Hopi biaha e gruponan cu a sali dilanti a wordo pinta pa afiliacion politico, hasta a bai asina leu cu nan a purba di wordo intimida publicamente. Dialogonan ta bai hopi dificil y na final ora cu ta priminti algo, toch ta hasi locual cu gobierno kier. Alumnonan cu tin un of otro descapacidad tin mas dificultad awor pa yega pa hasi test y basicamente alumnonan cu mester e extra ayudo no ta ricibiendo esaki. Ta dunando tur sorto di curso pa maestronan yuda e proceso na scolnan pero no kier tuma maestro suplente casi mas, kiermen ta esnan cu tin otro tarea den scol mes tin cu val in y nan tarea di remedia of guia ta keda atras. Un lucha cu na varios ocasion a desenboca den Parlamento pero cu ningun resultado, 3 aña despues ainda gruponan di maestronan di alumno special ta purba trece nan punto di bista dilanti y ta ser grita y recorda cu ta gobierno ta manda, nan voz simplemente no ta conta. 3 aña despues e werksternan di scolnan ainda ta biba y traha den incertidumbre. Un capricho contra personalnan di limpiesa ta pone cu e situacion di un di e fundacionan di scol mas grandi na Aruba, ta bai atras cu miyones siendo cu si ta ser exihi pa gobierno pa scolnan por cumpli cu tur regla di hygiena durante un pandemia di e magnitud aki. E personal di limpiesa nan salario ta baha drasticamente y nan trabou indespensabel awor mas cu nunca den temporada asina vulnerabel pa mundo ta wordo castiga. Personal di limpiesa ta hañando contractnan di 3 luna siendo cu nan tin añas ta trahando den servicio pa un scol. Instructornan di natacion tambe ta den incertidumbre ainda y no tin claridad ariba kiko lo pasa cu nan. Maestronan y alumnonan particularmente den Enseñansa special ta tene nan curason pa e decisionan cu tin den tapara pa nan. Si continua, Aruba por bai back caminda cu hopi alumno por keda sin bai scol, sin lesa ni skibi. No ta tur cos cu internacionalmente ta un trend ta bon pa Aruba. Scolnan special y nan alumnonan a desaroya hopi positivo na Aruba y a hasi un diferencia grandi den bida di hopi di muchanan cu awe ta adultonan independiente. Mescos por bisa di scolnan publico, cu si cai bou di un fundacion por perde e meta cu netamente e la wordo traha pe. 3 aña despues e topico di privatisacion di scolnan publico ainda ta riba mesa, segun expersionan den media di parti gobierno, apesar di tin conseho negativo pa cu esaki di parti Parlamento y toch ta keda den discusion. Sra Arends-Reyes te ainda ta wardando riba contestacion di su preguntanan oficial dirigi cu urgencia na Minister pa asina por tin mas claridad pa tur e preocupacionan aki. No obstante cu Enseñansa no ta pasando den su mihor momentonan ta keda demostra cu e forsa, boluntad y curason di maestronan ta grandi y nan ta un grupo cu semper mester ricibi nan elogio pa e trabou grandi cu nan ta eherciendo pa nos pais sra Arends-Reyes ta termina bisando.