Ta na su luga pa analisa e prome 100 dianan di Gabinete Wever Croes, caminda tin cu conclui cu aki ta trata di un gobierno sin haci nada, segun miembro di fraccion di AVP den Parlamento, sr Arthur Dowers.
No solamente gobierno di coalicion nobo no a logra absolutamente nada den su prome 100 dianan, pero nan a briya entre otro pa un persecucion politico sin precedente y pa expresionnan serio contra libertad di expresion di gremionan.
“E gobierno aki ta un gobierno cu a bin di mentira y hasta mi ta puntra si e gobierno aki conoce e diferencia entre berdad y loke no ta berdad.
Net dialuna na momento cu gobierno a dicidi di bin duna cuenta di e prome 100 dianan na mando sin haci nada, ta bisa gremionan cu nan tur a keda boca cera pa ocho aña largo y cu awor nan kier habri nan boca.
Na 2009 gobierno di MEP a laga e fondonan di pensioen di e pais aki, practicamente den bancarota pero ora cu AVP a drenta gobierno, nos no a perde tempo pa bay papia di esaki pero a traha duro pa busca solucionnan pa problemanan grandi cu a wordo laga atras.
E tempo ey realmente tabatin un crisis pero e tempo ey partido AVP a bay cerca pueblo y a pidi un mandato pa atende cu problemanan di e pais, nos a haya e confiansa pa 13 asiento y for di e prome dia nos a cuminsa atende cu tur asunto di interes general di pueblo.
E prome 100 dianan nos a traha, hopi trabou a wordo haci y nos a envolvi tur gremio den un dialogo nacional, pa asina tur hende hunto cu gobierno, tabata riba mesun liña di kico ta bay wordo haci.
Ta un falta di respet awo pa un Minister Presidente kende tabata den oposicion y tur e tempo ey tabata stimula bagamunderia, tratando na caba cu e pais aki cu apoyo di cierto sindicatonan pa nan bay yud’e pa kima Parlamento, purba bruha tera, purba stroba maneho di gobierno.
Varios di nan a bin pidi tur tipo di aumento den loke tabata un intento pa crash finansa publico di pais Aruba y mi tin cu bisa cu nos logra, trahando duro, haciendo esfuersonan grandi y tambe sacrificio, nos a logra cu gobierno di AVP a pasa su ocho añanan cu nos no a castiga nos pueblo manera e gobierno actual tin intencion di bay haci.
Ta e gobierno aki a priminti di baha cantidad di minister na shete, na luga di esaki a aumenta esaki cu ocho minister, y a nombra un asina yama ‘staatssecretaris’ cu tin mesun salario di un Minister, mientras cu a tuma algun ex minister cu salarionan astronomico y asina ey ta gaña pueblo cu nan lo baha e cantidad di minister.
A priminti cu lo baha edad di pensioen pero te ainda no tin nada di esey y tambe a bisa cu nan lo no bay tuma ningun medida, ya cu gobernando cu 7 minister, bahando edad di pensioen, lo resta suficiente placa pa asina no tuma medida contra pueblo.
Sinembargo informacion cu nos tin na e momentonan aki, ta cu Minister Presidente y Minister di Finansa, ta wardando autorisacion di CFT di Hulanda pa duna permiso na gobierno aki, pa e ora nan haya placa fia bou condicionnan faborabel.
Te na e momentonan ey, gobierno no ta ser permiti dor di Hulanda, pa papia riba e pakete di medida cu lo mester wordo introduci caminda entre otro tin aumento di BBO, aumento di AZV, aumento di grondbelasting, aumento di loonbelasting y otro medidanan mas.
Tur dia intentonan ta wordo haci dor di e gabinete y e fraccionnan cu ta sostene nan, pa trata di convence pueblo cu cosnan ta malo pa asina habri caminda pa bin cu medida, pa motibo cu e gobierno aki, no tin nocion di loke nan tin cu haci pa no castiga pueblo manera nan a haci den pasado,” Parlamentario Arthur Dowers a trece dilanti.