Gobierno di coalicion actual ta den un situacion sumamente dificil pa falta di un vision, pa falta di un plan di gobernacion y pa falta di conocemento con mester goberna nos pais.

Parlamentario Mervin Wyatt Ras di fraccion di AVP ta mustra cu gabinete Wever Croes no tin fin di cuminsa traha pa pueblo pa sa kico nos pueblo por spera, mientras e fraccion nobo den Parlamento ta e defensor di e gobierno di coalicion c’un comportacion cu ta parce ainda di campaña electoral.

Den un intento pa mustra cu tur cos aki na Aruba ta negativo, gobierno ta insisti pa convence tur hende cu nada ta bon riba nos isla, cu nada a cambia den ultimo ocho aña, mientras cu tur caminda, den tur bario rond di nos isla, por mira cambionan grandi y positivo cu a surgi den gobernacion di AVP.

Parlamentario Wyatt Ras a sigui mustra cu no solamente infrastructura, pero riba tur nivel di gobernacion, Gabinete Mike Eman I y II a trece cambionan significante y positivo pa sirbi interes di nos pueblo.

“Ora cu mi persona papia cu gobierno di coalicion a trece pobresa, ta pa e motibo cu desde cu el a wordo huramenta, ainda pueblo ta sperando riba e plan di gobernacion y kico nan tin pa mehoracion di nos pueblo. Pero al contrario.

Loke gobierno a bin ta haci te cu awor, ta persigui y kita hende fo’i trabou kitando pan for di nan boca cu promocion di pesimismo pa falta di tin solucion pa sirbi interes di nos pueblo y ta sigui insisti pa trata di convence pueblo cu no por a haci nada den e prome 100 dia di gobernacion.

Ta tristo pa tuma nota con ta purba defende e gobierno nobo dor di  pretende cu lo ta gobierno di AVP lo a crea pobresa, mientras cu gobierno di AVP a mehora e posicion di nos ciudadanonan aki na Aruba.

A yuda esunnan di mas necesidad cu pago di entre otro reparatietoeslag, placa di scol pa muchanan, aumento di salario minimo, aumento di bijstand, aumento di placa di pensioen y cantidad di otro decisionnan tuma pa sirbi interes di nos pueblo.

Nan ta ciego pa mira e importancia di renobacion di Oranjestad, e alivio grandi cu Green Corridor a trece y e importancia di mudamento di waf di carga pa Barcadera.

Un gobierno y su politiconan cu ta ciego pa mira y acepta miyones cu a ser hinca pa drecha scolnan rond Aruba, pa drecha infrastructura den casi tur  bario.

Ainda loke e gobierno no kier mira cu Gabinete Mike Eman en bes di keha y acusa hende of kita hende fo’i trabou a haci inversionnan grandi den diferente proyecto pa drecha e nivel di bida di nos hendenan.

E coalicion en bes di busca forma pa sigui cu mesun maneho dirigi riba e hende ta blo papia di mega debe anticipando nos hendenan cu pronto lo bay tuma medida.

E gobierno actual en bes di bisti su sapato y presenta su presupuesto ta scoge pa laga CFT dicidi kico nan ta trece como presupuesto.

En bes di entrega dicho presupuesto ta core skirbi articulo pa desmenti cu nan ta crea problema y pobresa den nos pais.

Tanto cu a grita cu asina nan drenta gobernacion lo kita parkeermeters y cu esakinan lo ta stroba comercio den Oranjestad, awe keto bay tin parkeermeters y e control a keda mescos. Wyatt-Ras ta conclui cu en bes cu representantenan di gobierno ta core skirbi articulo pa contest’e nan por speed up e proceso pa presenta e LIM y presupuesto 2018 na Parlamento y di berdad cuminsa pone nos pueblo na prome luga.