Parlamentario drs. Mervin Wyatt-Ras ta trece padilanti cu dialuna gobierno tabata den Parlamento pa un “gedachtenwisseling” encuanto e Najaarsnota 2022. Segun Wyatt-Ras gobierno enbes di atende cu pobresa, stimula incentiva pa empleo y recuperacion economico a haci show cu e Najaarsnota cu insulto bao nivel.
Loke mester a sosode ta tratamento di e presupuesto suppletorio 2022 cu te ainda gobierno no a keda cla cun’e pa entreg’e na Parlamento. Pero pa gana tempo y pa tene Parlamento keto gobierno a bin presenta e Najaarsnota, esaki mientras otro reunionan cu fraccion di AVP y oposicion ta pidi no ta ser yama. Tampoco e gobierno aki no tin fin di presenta jaarrekeningen di anjanan anterior pa asina mustra berdaderamente kico a sosode cu placa di pueblo.
Por menciona alabes cu e minister di finanzas cu gran fanfaria a bin entrega e presupuesto di anja 2023 na Parlamento, pero ora cu a bai tuma nota di esaki a resulta cu e ta un presupuesto ficticio. Den e presupuesto 2023 ta describi introduccion di BTW pa genera entrada y reaccion di Raad van Advies y CAft ta basa ariba introduccion di BTW. Mientrastanto e minister presidente a manda e minister di finanzas vakantie pa bin anuncia cu no lo introduci BTW mas, sino lo aumenta BBO cu 1.5% sin ningun vangnet. Pues e realiteitsgehalte di e presupuesto 2023 entrega na Parlamento ta nul comma nul. Esaki kiermeen den papiamento crioyo cu e presupuesto no ta cuadra cu realidad pues e ta FAKE, e ta un mentira.
Aki por mira cu e gobierno aki a perde tur berguensa y ta ganja tur hende, ta ganja pueblo, ta ganja gobierno Hulandes, ta ganja Raad van Advies, ta ganja CAFT y hasta e papel cu nan ta usa pa skirbi riba dje nan ta ganja.
Ta pesey cu nos pueblo no tin confiansa den e gobernacion aki mas. Ta fresco den nos memoria con e minister di finanzas a presenta BTW na diferente entidad, profesionalnan y hasta na Parlamento, pa despues sin consulta cu e stakeholders cancela tur cos pa awor bai over na un otro decision. Atrobe e decision aki ta pa corta den cartera di cuidadanonan enbes cu ta busca otro alternativanan pa genera entrada, manera e.o. crea empleo, incentiva nos economia, baha redtape, mihor compliance, cooperacion entre entidadnan pa eficiencia y especialmente baha gastonan operacional di gobierno.
Durante e reunion encuanto e Najaarsnota a monta full un show. Aki e parlamentarionan y cheerleaders di gobierno a para gaba con bon nan gobierno ta traha y e ministernan enbes di contesta preguntanan critico di coleganan a para lastra miembronan di parlamento opositorio cu tur sorto di cos. A bully miembro di fraccion di AVP yamand’e pa resto di homber, a bully un otro colega cu e lo no tin passpoort y hasta e minister presidente a duna ordo na e presidente di Parlamento pa laga saca un sra. humilde for di tribuna dor di dos polis, djies paso el a haci par di remarca. Ta un berguensa pa tende ministernan contesta preguntanan na un nivel pareu cu vloer manera ta riba mercado di piska nan ta. Especialmente e dos ministernan femenino Evelyn y Xiomara ta ganja y baha na nivel di lodo enbes di keda profesional.
Loke a pasa ayera ta duna Parlamento y nos como parlamentario un mal nomber y ta baha calidad di parlamento.
Pero kico mas por spera di un gobierno dysfuncional loshi potoshi y su stempel-parlement. Paso ora bo pone ken cu ta pa representa bo, trabounan ta wordo haci con cu ta y e resultado ta kico cu ta. Esaki ta nan mesun palabra cu ta conta pa nan mes.
E gobierno intransparente aki no tin sosten tampoco di profesionalnan, sindicatonan, comercio, stakeholders den mundo medico, maestronan, y trahadornan.
Pueblo no kier tende insulto sino kico e gobierno ta bai haci pa un yiu di tera por haya trabou, pa nos hendenan por tin placa pa paga nan huur, nan awa, coriente y cuminda na prijs rasonable. Pueblo kier skucha con pa stop persecucion politico, pa finalisa fraude den DVG, fraude na Arubahuis, con pa mantene dokternan, specialistanan y maestronan na Aruba, zorg pa tur mucha por bai skol sin ser exclui paso nan no por paga schoolgeld of no tin pan pa come pa nan por sinja bon. Pueblo kier skucha con nos cuidadanonan por keda cu nan derecho riba bon cuido medico sin diferencia den clase.
Al contrario reunionnan asina ta bai dedica na insulto y wak patras den pasado enbes di mira e futuro y con pa haci mihor pa nos pueblo.
Pesey mes Wyatt-Ras y su coleganan lo keda vocifera nos opinion fuerte contra e gobierno loshi potoshi aki y a manda un carta pa gobierno trek in e presupuesto ficticio aki y presenta un presupuesto realistico sin mentira na Parlamento.
