Parlamentario Wyatt-Ras ta trece padilanti cu gobierno Mepporred no ta serio. A keha 8 anja largo di gastonan di gobierno anterior y a tilda gobierno anterior di a crea mega debe y awor ta resulta cu nan a ganja pueblo.
A resulta cu nan gastonan di personal y di operacion diario di gobierno, viahenan di ministers, compra di auto pa buro, publicidad etc. a subi di tal forma te el a yega 125 miyon.
Envez di baha gastonan y baha e cantidad di minister unda por spaar 40.2 miyon florin, a subi gastonan. Hasta promer cu esaki a fia placa pa nan por financia maneho nobo, esaki segun Rapportahe di Caft.
Gobierno a ganja pueblo cu p’e e ser humano ta central sin embargo prome paso cu ta tuma envez di crea empleo ta pa tuma medida contra nos pueblo, cu aumento di accijns y aumento di BBO te na 6 %.
Gobierno a hasta ganja CFT cu lo tene su gastonan abou y lo yega e norma di 3.0% di deficit, sin embargo durante tratamento di presupuesto 2018 den reunion publico a pasa CFT y nos pueblo un “fast ball” pa aumenta gastonan den 5 nota di cambio. Gastonan di personal a aumenta cu 13 miyon y gastonan di operacion cu 17 miyon en comparacion cu gobierno anterior.
Gobierno a ganja cu lo mejora poder di compra. Pero pueblo ta sinti caba cu prijs di producto/comestibles ta subi. Nos hendenan ta bai keda cu menos placa den nan cartera pa por pone pam ariba mesa di nan famia.
Gobierno a priminti cu lo baha prijs di awa y coriente y ya caba pueblo ta sinti cu esakinan ta subi.
Gobierno a ganja tambe cu lo crea mas empleo pero ora cu CITGO a anuncia e slow down gobierno a haci net nada. Loke si gobierno ta haci ta kita hende y persegui esnan cu no ta di nan signatura politico pa pone nan hendenan, al estilo di “quitate tu pa ponerme yo”.
Gobierno a ganja alavez cu lo pone airco na tur skol, lo baha edad di pensioen y lo kita aruparking, sinembargo ni foe no fa di e promesanan.
Notable ta cu di un banda ta castiga pueblo medida y di otro banda pa nan si tin placa y luho.
Hancho pa gobierno y smal pa pueblo.
Wyatt-Ras y su fraccion ta condena e enganjo aki y lo sali na defensa di nos pueblo.
