Parlamentario drs. Mervin Wyatt-Ras a tuma nota cu enfermeronan di Spoedeisende Hulp (SEH) na dr. Horacio Oduber Hospital a tene un walkout pa motibo di e trato cu nan ta ricibi di nan bishitantenan durante ultimo lunanan, esta pashentnan. Hasta ta warda 4 pa 5 ora. Nan ta exihi proteccion, entre otro glas pa e secretariado cu ta atende publico na entrada. Directiva ta di acuerdo cu sindicato cu mester bin cambio.  Representante di e sindicato di enfermeronan a trece padilanti cu minister Dangui Oduber a priminti cu lo bon mas trahador na SEH pero ainda edaki no a sosode.  Wyatt-Ras ta lamenta cu tanto cu esnan den gobierno actual a critica gobierno di AVP den pasado y a priminti cu nan lo drecha servicio di SEH y baha e tempo cu pashent mester warda pa ser atendi na SEH nan no a cumpli, especialmente e minister actual Dangui Oduber. Pesey mes por imagina cu pashentnan cu ta warda mucho largo ta perde pasenshi. Si 

Ademas no a bin cambio den e tempo cu pashentnan mester warda pa ser atendi dor di un specialista. A papia di fortifica dokternan di cas pa por atende cu aumento di malesanan chronico, sinembargo ainda no a yega na mehoracion. Gobierno a ganja pueblo. 

Awe pueblo ta puntra si e minister di salud ta trahando pa sigui mehora derecho di pashent, manera gobierno anterior a bin ta haci dor di e.o. introduci diferente leynan di Calidad di salud y dor di coloca Praktijkondersteuners na e diferente oficinanan di dokter. 

E gobierno aki ademas ainda no por keda cla cu renobacion y expansion di hospital. Esaki tabata necesario pero no a ser sosteni nunca di minister Oduber y su Gabinete. E gobierno aki tampoco no a implementa e ley di BIG cu den gobernacion di AVP a ser presenta cual a ricibi aprobacion unanime di Parlamento. Gobierno no ta cumpli cu su promesanan, mientras ta persegui trahadornan, hefe di departamento y hasta dokter a base politico. Pesey mes por conclui cu e gobierno aki no tin e hende como central.