“Algun luna pasa, e 3 partidonan den Parlamento cu ta forma coalicion y ta sostene gobierno, a traha riba un amienda di ley pa cambia palabracionnan cu Minister President y Minister di Finansas a haci cu gobierno di Reino encuanto CAFT.
E palabracionnan aki a wordo stipula den loke a wordo yama “e Protocol” pa cu e ley di LAft.
Awor si bo ta un persona cu a studia nos leynan y reglanan constitucional, e loke a pasa pa cu e ley di LAft y e protocol, lo ta bisa bo hopi y lo bo sigui e desaroyonan cu hopi atencion.
Pero si esaki no ta algo cu bo a studia y bo no ta sigui esaki di cerca, tal bes, loke a pasa e ultimo dianan lo ta dificil pa compronde tur e detayenan tumando luga.
Nos leynan constitucional ta stipula cu Parlamento ta e organo mas halto den nos pais, esey ta nifica cu Parlamento ta controla gobiernoy cu Gobierno, ta raporta na Parlamento y tambe ta bon pa bisa cu e 2 instancianan aki hunto ta traha riba nos leynan, pues nan ta co-legislador na Aruba. Pa por pasa un ley, Parlamento mester tin un mayoria di 11 of mas di e 21 parlamentarionan, si no e gobierno no tin sosten di mayoria y mester baha.
Loke a pasa cu e ley di LAft ta un violacion di e sistema legal. Gobierno di Aruba, despues di a cera e protocol cu Hulanda, a pone e palabracionnan aki den un ley y manda esaki pa Parlamento trate y vota riba dje.
E 3 partidonan (MEP-POR-RED) den Parlamento cu ta sostene gobierno no tabata di acuerdo cu e ley y nan a cambia e ley cu gobierno a presenta drasticamente y a kita tur link entre finansas di pais Aruba y Gobierno di Reino.
Den e caso specifico aki, esaki lo a resulta cu CAFT lo no tin contacto mas cu Gobierno di Reino pero lo mester duna cuenta solamente na Parlamento di Aruba loke riba su mes, esaki ta parce corecto.
Loke no ta corecto ta cu un mayoria den Parlamento a pone un ley di su propio gobierno un banda of cambia esaki drasticamente sin consecuencia politico pa e gobierno. Den nos sistema constitucional, esaki ta wordo interpreta como un rechaso di e maneho di e gobierno. Pues Parlamento no ta dunando sosten mas pa e maneho y e gobierno mester baha.
Ora cu e parlamentarionan a cambia e ley di LAFT cu nan amienda y pas’e votando pro, e cos a complica mas ainda. Normalmente gobierno, na su turno, mester tuma un ley cu a wordo pasa den Parlamento y manda esaki pa Gobernador firma pa e ley bira vigente.
A resulta cu gobierno a wanta e ley pa algun luna y no manda esaki pa Gobernador cu ta inusual y fuera di normal. Por considera esaki como un eror riba un eror constitucional, pasobra gobierno no a baha ora a rechasa nan ley inicialmente.
Awor gobierno ta keda sin encamina e caminda pa ehecuta e ley despues cu un mayoria den Parlamento si a pasa e ley. Pues doño di trabou cu ta Parlamento ta duna gobierno un ordo, y gobierno ta bisa e doño di trabou cu e no ta haci nada cu e ordo.
E ta pone un band ay awor ta parce cu doño di trabou, esta e parlamentarionan di MEP-POR y RED ta bay di acuerdo cu e posicion di gobierno aki tambe.
Si esey no tabata suficiente, gobierno no a djis keda sin manda e ley pa Gobernado pero Gobierno a bay mas leu ainda y manda un carta pa Parlamento, indicando na Parlamento cu lo nenga di ehecuta e ordo y lo no manda e ley pa Gobernador tampoco.
A manda un copia di e carta aki pa Gobierno di Reino cu a yega Hulanda, na otro banda di oceano, algun dia prome cu el a yega Parlamento cu ta net un porta pariba di Cocolishi. Tur esakinan no ta normal den nos sistema constitucional.
Parlamento mester a tuma nota den prensa cu e carta a bay pa Parlamento siendo cu Hulanda ya a ricibi e copia. Tur esaki, un dia prome cu Hulanda mester a dicidi si ta duna Gobierno di Aruba un KB of no.
Den nos sistema constitucional, loke a pasa y loke ta pasando ta imposibel y inaceptabel. Fraccion di AVP a indica di inicio cu e forma di procede pa cu ley aki no ta corecto.
Nos por mira cu gobierno mester a bay cas mas cu un biaha caba. Un biaha mas e gobierno aki ta mustra cu no ta respeta e instituto Parlamento bou ningun circumstancia y awor e partidonan cu ta sostene Gobierno tambe ta mustra cu nan ta di acuerdo cu esaki. Parlamentarionan di e 3 partidonan aki ta mustra cu nan no ta tene gobierno responsabel pa e falta di respet repetitivo aki y ta laga gobierno sigui haci loke nan kier.
Dia tabata trata e ley di LAFT den Parlamento, colega Richard Arends a haci un pregunta na Prome Minister kico su conseho di voto ta pa su parlamentarionan. Prome Minister a bisa cu e ta di acuerdo cu e amienda y cu e mes kier a bin cu e puntonan aki.
Pues esaki ta nifica cu e no tabata di acuerdo cu su propio ley di LAFT cu el a entrega na Parlamento, ni e no tabata di acuerdo cu su mes Protocol cu Hulanda cu el a firma y basa su ley riba dje.
Con bo por ta contra un ley awe y pro mañan pa e mesun ley? Con bo por ta contra un amienda awe y despues di un rato den e mesun reunion bisa cu bo ta pro e amienda? Con bo por firma un protocol cu Hulanda y despues bisa cu bo ta contra e protocol? Con bo por respeta bo coleganan di Partido y di coalicion den Parlamento dor di bisa nan den nan cara cu bo ta di acuerdo cu nan ley y e amienda y despues manda nan un carta bisando cu bo no lo manda nan ley pa Gobernador?
Mi ta kere cu no ta nos so ta haña cu esaki ta inaceptabel, pero hopi cu ta sostene e gobierno aki y tambe esunnan na Hulanda. Esaki ta nos sistema constitucional riba su cabes!”
