Gabinete Wever Croes a drenta su di cuater aña di gobernacion pero te ainda pueblo no por mira algo di tur e promesanan cu a wordo haci, cambionan cu lo a yuda pueblo bou di e gobierno aki pero tur loke Prome Minister Evelyn Wever Croes y su gobierno a duna pueblo, ta un medida tras di medida y salario y beneficionan pa friends and family.
Parlamentario Mike de Meza di fraccion di AVP a mustra cu simplemente gobierno di MEPPORRED, no por presenta ningun perspectiva alentador pa pueblo haya un alivio, ni economico, ni social, ni laboral y sigur ningun perspectiva kico ta spera e pais den e añanan nos dilanti.
“Tur esaki pa motibo cu Prome Minister y su gabinete mes no sa kico lo bay pasa, ya cu na momento cu nan a drenta gobernacion di e pais na 2017, e gobierno aki no tabatin un plan di gobernacion, no tabatin sikiera un vision y e unico speransa cu a duna pueblo, tabata un serie di promesanan falso cu nunca a wordo cumpli.
Ta bon pa nota cu mientras pueblo despues di tres aña di gobernacion di e gobierno di coalicion actual, ta solamente un grupo di friends and family, sponsornan y sostenedonan di partidonan den gobierno, a wordo recompensa, a haya trabou cu salario y beneficionan sublime.
Pueblo a haya medida tras di medida, a mira con gobierno a ranca placa for di den nan cartera bay cune, mas cu 300 miyon sin duna nos hendenan algo a cambio.
Te awe tres aña despues, Prome Minister y su gobierno no por presenta un vision pa e pais di kico su gobierno ta bay haci den e ultimo aña di gobernacion aki pero tur cos ta mustra cu Evelyn lo entrega pueblo di Aruba, un pais sin autonomia, un Parlamento sin autonomia y un pais na werki caminda su hendenan lo ta e uniconan beneficia di maneho cruel cu el a hiba.
Ni Parlamento no sa cual ta e vision y direccion cu e gabinete Wever Croes ta hibando, ya cu e propio tres fraccionnan cu ta sostene e gobierno aki, ta wordo mal usa como marionetanan cu tin cu haci loke gobierno manda bisa pa haci.
Menos c’un aña pa eleccion, gobierno tin netamente nada pa mustra pueblo cu el a logra, ningun proyecto, ningun plan economico, ningun plan social cu e tin tres aña trahando ariba y cu na Hulanda ainda nan ta puntra kico e plan aki ta encera.
E unico defensa cu Prome Minister y su gobierno tin, ta sigui papia di e gobierno anterior, sigui busca escusanan mediocre pa sconde su propio fracaso y pueblo ya a cuminsa fada di e maniobranan di desesperacion aki, ya cu realmente pueblo a mira e gran diferencia caba.
Ta na su luga pa analisa cierto puntonan di e gobierno actual, caminda den tres aña pueblo a mira con dos Parlamentario a wordo forsa pa bandona nan posicion den Parlamento pa comportacionnan no adecuado.
Un Minister a dicidi di baha na awa y cora bay pa motibo cu husticia ta su tras y ta locual tambe a wordo confirma pa e Minister cu a bira su sucesor cu a bin haya cantidad di decisionnan incorecto y contra tur regla existente.
Otro miembro di parlamento cu tabata sostene e gobierno aki, a dicidi di declara su mes independiente ya cu e no kier a sostene e maneho dudoso di e ex Minister di Infrasxtructura, esta esun cu a core bandona gobierno.
Awor recientemente Prome Minister herself ta dicidi di retira e unico Minister cu e tin cu si a para pa loke e gobierno aki a grita duro na inicio, esta integridad y e unico eror cu el a comete ta di denuncia corupcion di parti di su coleganan den Conseho di Minister.
Parlamento tambe recientemente a wordo pone na berguensa ora cu a tuma un decision cu ta contra Constitucion, cu ta contra reglanan existente den e forma di proceder di parlamento.
Pa colmo Prome Minister ta bira haci un declaracion caminda e ta bisa cu no ta importante si e decision di Parlamento tabata ilegal ya cu el a haya un otro via legal pa retira su propio Minister.
Pero aki pueblo por mira cu ta mesun Prome Minister cu a papia continuamente di integridad, a papia di gobernacion cu transparencia, y a insisti cu mester tin bon gobernacion.
Awor e ta parti di elimina un Minister cu realmente a para pa e puntonan aki y a tuma over e cartera di e Minister cu no a haci nada malo cu solamente denuncia corupcion den e gobierno actual,” Parlamentario Mike de Meza a declara.
