Contrario na e pensamento cu Gobierno lo ta bahando su gastonan, e realidad presenta durante e reunion di presupuesto supletorio ta totalmente diferente. Ta nota cu structuralmente a aumenta e gastonan te cu mas si 100 miyon florin adicional, si compara cu e realisacion di aña 2017. E medidanan cu e Gobierno aki awor a anuncia y e entradanan adicional di aumento den BBO y BAZV, a tapa precisamente e aumento di gastonan, cu ta gran parti na tumamento di mas coordinador, mas gasto di oficina y aumento den “goederen en diensten”. Segun Arends, esaki ta e motibo principal pakico fraccion di AVP no a aproba e presupuesto aki.
Cu e realidad ey den mente, miembro di Parlamento, mr. drs. Richard Arends, a para na e aumentonan aki y a puntra Gobierno pa responsabilisa e motibo cu a hisa tur nan gastonan di e forma aki. Tambe pa splica si e patronchi di aumenta gasto y di tumamento di mas personal den Gobierno lo continua den e aña nobo. Pasobra esaki ta precisamente e puntonan cu a informa CAFT cu lo atende y lo baha drasticamente den 2018 y den 2019, loke de facto no ta sosodiendo.
Despues di e Nota di Cambio presenta anochi laat, e post di “Goederen en Diensten” a aumenta cu cas 30 miyon florin, esta 18% mas cu realisacion di aña pasa.. Den e forma cu nan a pone den e presupuesto supletorio, ta dificil pa por compara e gastonan cu otro. A puntra Gobierno pa e splica miho cua post bou di Goederen en Dienstena aumenta tanto y dicon Gobierno na su turno a desvia e contesta y no a duna Parlamento e splicacion debido.
Pa loke ta gastonan di personal, Gobierno a splica cu e aumento ta debi na periodieken, na promocionnan y overtime. Segun Gobierno e gastonan aki ta subi anualmente cu 7 miyon florin di manera autonomo. Esaki ta e caso tambe aña aki. Contrario na esaki, Gobierno a bisa di lo reduci gastonan di personal cu 3 miyon. Si mira e locual Gobierno ta pronostica na gasto y esun real, anto tin un diferencia di 10 miyon na 2020 y un diferencia di 20 miyon na aña 2021 cu Gobierno no por splica.
Gobierno a anuncia cu a termina contract di 482 empleado publico pero cu a tuma 266 empleado nobo. Un diferencia di 216 empleado menos den servicio di Gobierno. Sinembargo, cifranan ta mustra cu Gobierno tin 100 empleado mas den servicio, pues un diferencia di 316 empleado cu Gobierno no a sa di splica.
Gabinete Wever-Croes ta papia hopi di austeridad y di baha gasto mas cu ta posibel, sinembargo den e presupuesto supletorio di e aña aki ta nota cu nan forma di traha ta net contrario di locual nan a bisa di lo haci. Nan ta empleando masha hopi hende, ta gasta mas na huurmento di edificio, na servicionan y asina por sigui menciona. No ta keda ningun otro conclusion pa bisa cu tur e medidanan impone a bay pa genera mas entrada pa cubri precisamente e gastonan adicional cu a ocasiona e aña aki.
