Den su mensahe na nomber di gobierno di Aruba na occasion di apertura di aña Parlamentario 2019-2020, Su Excelencia Gobernador Alfonso Boekhoudt a hiba e mensahe di gobierno caminda fraccion di AVP a nota cu simplemente cu practicamente gobierno no tin nada nobo y positivo den lunanan cu ta bin.
Miembro di fraccion di AVP a mustra cu e mensahe hiba na Gobernadorr tabata uno bashi sin mucho perspectiva cu cosnan lo drecha dentro di poco.
“Gobernador a trece dilanti e plan di maneho di gobierno caminda nos a nota cu tabata trata di un plan bashi, atrobe sin un perspectiva pa futuro.
Nos tur sa cu tin un reforma fiscal cu no ta nada otro un aumento di impuesto cu ta na caminda gobierno no a elabora nada riba esey, con e ta bay afecta e poder di compra di nos ciudadanonan, con e ta bay afecta economia, e crecemento economico.
Al contrario gobierno ta papia mas di un maneho economico no obstante di e maneho cu a presenta caba, lo bin otro manehonan economico y for di tercera parti nos a haya sa cu Minister Lampe encarga cu desaroyo sostenibel, tambe tin un maneho di economia circulando.
Pues hopi contradiccion y falta di un rumbo na unda nos tin cu bay y tambe pa loke ta trata e parti economico y e parti financiero.
E parti financiero e unico splicacion cu a duna ta mas aumento di impuesto, esey nos por a compronde tambe di e mensahe cu a wordo duna y mi ta kere cu esey ta di lamenta ya cu mi ta kere cu gobierno tin hopi cos pa haci.
Nos a conoce un aumento di gastonan di gobierno den ultimo dos añanan cu rapportnan di CFT tambe ta indica mientras cu no tin claridad tampoco kico lo sosode cu e ley di supervision financiero,” Parlamentario Richard Arends a mustra.
Miembro di fraccion di AVP, Jennifer Arends Reyes a mustra cu e discurso di Gobernador tabata un refleho di loke gobierno den su totalidad tin como meta.
“Pa loke ta e proximo aña parlamentario mi por bisa cu e parti riba democracia cu a wordo presenta ta importante pa pais Aruba pero naturalmente nos tin cu keda enfoca riba e partinan cu mester di hopi atencion na e momentonan aki na Aruba.
Aki mi por menciona por ehempel enseñansa caminda por mira cu tin hopi preocupacion tanto bou di maestronan, mayornan pero tambe alumnonan y ta algo cu mester bay pone hopi enfasis ariba.
Mescos cu Gobernador a menciona, e parti di educacion ta e weso di lomba di un pais, mustrando cu e ta e parti caminda cu e autodeterminacion di e personanan ta wordo fiha y mi ta kere cu esaki ta algo sumamente importante pa nos pais, pa sigui traha riba e parti di educacion.
Naturalmente tin diferente otro aspectonan tambe cu mester duna atencion y sigui traha riba esakinan caminda nos ta wak hopi inkietud caminda no tin hopi trankilidad reinando na e momentonan aki pa loke ta ser treci dilanti di parti di gobierno.
Si gobierno tin un liña cu nan kier sigui, lo ta bon pa tene cuenta tambe cu loke pueblo ta duna como reaccion y loke nan ta sinti,” Parlamentario Jennifer Arends Reyes a mustra.
Parlamentario Michael Lampe a mustra cu apertura di aña Parlamentario nobo, tabata un momento pa refleha riba tur loke a sosode como trabou cu a wordo haci den parlamento pero tambe trabounan cu a wordo haci di parti di gobierno.
“Nos tur sa cu tin hopi critica, tin hopi caminda y espacio pa mehora pa loke ta e maneho y awe nos por a ripara un biaha mas, cu tin hopi trabou cu nos tin cu bay haci ainda, hopi pregunta cu nos tin cu bay dirigi na gobierno.
Nos por scucha diferente plan, diferente punto di enfoke cu ta bay tin pa e aña aki, entre otro mi por a scucha un biaha mas di parti di gobierno cu lo bay enfoca riba cultura, cual mi ta kere ta hopi importante pa desaroyo di nos pais integralmente, hunto cu e sustainable goals.
Sinembargo e realidad di tur esaki ta esaki ta bay ta un aña caminda nos mester ta bay ta hopi critico pa mira si en berdad lo bay ehecuta tur e plannan cu a wordo presenta y midi tambe realmente na unda y kico e desaroyonan positivo cu tin den e plannan aki.
Nos por mira cu otro aña parlamentario ta cera y otro ta habri pero e realidad ta cu nos no a mira e trabounan di e plan di gobierno realmente move den nos comunidad y esey ta un di e trabounan grandi cu gobierno tin cu bay cumpli cune,” Parlamentario Micheal Lampe e trece dilanti.
