“Si compara e gastonan den realisacion preliminario di presupuesto 2017, por conclui cu e gastonan di Gobierno a subi cu 125 miyon di florin pa aña 2018”, asina Parlamentario mr. drs. Richard Arends di fraccion di AVP a duna di conoce. E declaracion aki ta basa riba un comparacion entre e presupuesto 2018 despues di 5 nota di cambio y informacion den e ‘uitvoeringsrapportage’ cu a wordo presenta na Parlamento, unda ta analisa e entrada y gastonan te na final di e ultimo cuartal di 2017. “Pa cubri e gastonan aki Gobierno a aumenta su entradanan cu mas di 130 miyon di florin den aña 2018.” Cu e informacion aki Parlamentario Richard Arends ta reitera su ponencia caminda cu e ‘crisisheffing’ ta nada mas cu un “coalitieheffing” como cu e ta financia e maneho expansivo di e gabinete nobo. E gastonan total ta consisti di e gastonan coriente, inversionan, como tambe e contribucion adicional e fondo di AZV door di entradanan adicional door di e aumento di BAZV.
“No tabata tin ningun esfuerzo sincero pa reduci e deficit bou di e norma di 3.0%,” asina Sr. Arends a declara. “Na inicio di e tratamento di presupuesto Gobierno a pretende di lo a reduci gasto, pero contrario na esaki sa di a aumenta esakinan via cinco nota di cambio for di bista di CAFT prome” Bayendo un poco mas profundo den su analisis, e Parlamentario pa fraccion di AVP ta indica cu e intensificacion mas grandi ta den personal y operacion di oficina cu a aumenta cu 13 y 17 miyon di florin respectivamente compara cu e realisacion di presupuesto 2017. Loke ta remarcabel cu proyectonan di Gobierno por lo general a subi cu 35 miyon florin como tambe subsidionan cu 18 miyon.
E “crisisheffing” cu ta consisti di aumento di BBO, BAZV y accijns lo mester genera 80 miyon florin den caha di Gobierno pa aña 2018, segun e presupuesto aproba pa partidonan den coalicion. Ademas di esaki Gobierno ta conta cu entradanan incidental di mas di 40 miyon di florin na dividendonan di empresanan estatal, reservanan y demas fondonan publico. Gobierno ta spera di haña 5 miyon florin mas for di otorgacion di diferente permisonan, derechonan y otro servicionan cu Gobierno ta brinda e ciudadano. Como cu Gobierno no a duna claridad riba nan maneho, ainda nos no sa si lo brinda mas servicio of si lo aumenta e tarifanan pa logra e sumanan aki. “Un cos ta sigur: e aumento di e peso pa ciudadanonan y empresanan local cu Gobierno ta impone door di aumenta BBO, BAZV y accijns ta pa financia e gastonan nobo aki”, Parlamentario Richard Arends a bisa.
Esaki no ta inclui ainda cu e pakete di compensacion cu Gobierno a priminti e.o. un reduccion riba e prima di AZV p’e pensionadonan, aumento di reparatietoeslag cu 25 florin y mas incentivonan fiscal. Ambos medida di compensacion pa costa rond di 30 miyon. Eliminacion di impuesto pensionadonan por yega te na 100 miyon. No a tene cuenta cu esaki ni den presupuesto 2018, pero tampoco den cuadro financiero p’e añanan cu ta bin. “Esaki ta un di e motibonan principal pakico no a vota na fabor di e presupuesto aki,” Sr. Arends ta splica. “Aunke cu e pronosticonan di Banco Central publica un dia despues cu e presupuesto a wordo aproba ta coincidi cu esun cu Gobierno a uza den e cuadro financiero, esaki no ta inclui e efecto di e “crisisheffing” ni tampoco e pakete di compensacion. Esaki ta nifica cu probablemente e crecemento economico lo ta menos cu Gobierno ta pronostica. Esaki lo conduci na menos entrada y e deficit lo ta mas halto cu -3.0%.” Den algun siman e conseho di CAFT lo ta publico y e pregunta ta keda si CAFT lo bay di acuerdo cu e presupuesto incompleto aki sin ningun clase di reduccion di gasto.
Na momento cu presenta e cuentanan anual di aña 2017 na Parlamento lo por tin un indicacion exacto di e aumento di gastonan den presupuesto 2018. Tanten e realisacion a base di e ultimo uitvoeringsrapportage ta duna un bista cla cu presupuesto 2018 ta un expansion di gasto y ta pasa e cuenta di esaki pa ciudadanonan y negoshinan.
FIN
