E prome fase di e Reforma Fiscal a wordo introduci yena di palabranan bunita y a laga hopi hende contento pero e alegria aki no a dura mucho.
AVP den un conferencia di prensa a desbarata e cambio bunita cu Gabinete Wever Croes a presenta, ya cu e ta simplemente duna cu un man y cu e otro man ta rank’e bek for di pueblo y tur esaki ta sosode c’un falta di transparencia total, segun Arthur Dowers a declara durante di e conferencia di prensa.
E Parlamentario a compara e propaganda politico cu e mandatario ta haci cu loke Hugo Chavez a haci den pasado.
“Mira e situacion cu tin aworaki na Venezuela. Kiermen nos por mira kico ta spera nos si nos bay cay den wega politico di e hendenan aki.
E pakete di medida cu Gobierno a presenta ta bisa cu 30 mil hende no ta bay paga loonbelasting mas y 25 mil hende ta bay paga menos.
Si bo wak’e asina, hopi hende no ta bay paga belasting mas na Aruba y otronan ta paga hopi menos. Tin hende berdad ta bay paga 20 florin menos na Inkomstenbelasting, pero nan ta bay paga mas cu esey den otro cosnan.
E recogemento di sushi so ta mas cu 20 florin ya cu el a wordo stipula na 25 florin. Kisas nan ta bay paga na grondbelasting un 120 florin adicional.
Sra. Evelyn Wever Croes ta un persona cu a traha na belasting y conoce e sistema di belasting bon. Pesey mi ta spera e hendenan no confi’e, pasobra ora un hende tin e maña, kende den pasado a conseha Gobierno pa hisa e belastingnan y hisa edad di pensioen.
Ora cu a confronta su persona cu esaki, su reaccion ta cu ora e consehero di Minister di Impuesto e ta un cos y ora cu e ta politico ta otro cos.
Por mira cu ningun di e promesanan cu el a haci den campaña, e no a cumpli cu nan, pues simplemente no por confia su promesanan awor cu e reforma fiscal aki,” e Parlamentario di fraccion di AVP a mustra.
Dowers ta considera e señora aki un abusado di pueblo, pasobra el a traha den belasting y sa masha bon con e sistema ta funciona pa tuma e pueblo haci.
Ta bin c’un triki cu ta duna p.e. 20 florin bek pero e mesun 20 florin aki ta bay bek den caha di Gobierno ora cu bo bay cumpra pan of otro comestibles via di e BBO of ki tipo di belasting cu bo tin cu bay paga como consumidor.
“Pueblo sea alerta pasobra e Gobierno aki ta un wolf bisti den cuero di carne. E tin e pueblo na werki, y tin hopi hende sangrando caba y awo ta bin tira santo den wowo di pueblo gañanando cu ta bay baha inkomstenbelasting.
Mester djis corda con hopi Evelyn Wever Croes a bin ta gañando ya cu el a priminti gobernacion sin medida, un gobierno cu 7 minister, cu den un rato e ta bezuinig 50 miyon den cada ministerio.
Sinembargo awo CAFT a informa y confirma cu e no a baha gasto pero a aumenta gasto cu 130 miyon y por constata cu e medida no tabata pa paga debe di AVP pero pa paga famia- y amigonan cu mester a haya posicion.
Pronto e hendenan lo sinti e cambio y e crisis cu e gobierno aki a crea,” Parlamentario Arthur Dowers a declara.
