E alegria riba cara di dos minister di gabinete Wever Croes e siman aki na momento cu nan a efectua apertura di e proyecto di centro di pesca na Zeewijk-Cura Cabai, ta otro bibo ehempel cu te ainda e gobierno di coalicion no a ofrece na pueblo algo concreto y positivo.
Lider di fraccion di AVP, Marlon Sneek ta mustra cu e momento di inauguracion aki no solamente tabata un momento di alegria y di satisfaccion pa barionan menciona, pero na mes momento e ta ehempel bibo di mandatarionan cu tambe ta felis y contento cu gobierno di AVP tabatin un vision pa haci Aruba un miho luga pa biba pa henter comunidad.
Pa mustra e diferencia grandi cu tin entre gobierno di AVP y esun di coalicion actual, tin cu mustra riba e proyecto di centro di pesca di Zeewijk y Cura Cabai caminda ministernan di e actual gobierno, a mustra un felicidad cu nan por corta sinta, entrega yabi di otro proyecto cu gabinete Mike Eman tabatin e vision pa ehecuta.
Ta bon pa bisa cu e proyecto di centro di pesca aki cu minister Romero y minister Oduber a trata di briya cune, tabata un inversion di 2.7 miyon florin, cu ta un inversion husto ya cu e tabata un necesidad pa tur esunnan cu a haci uzo di e centro aki tanto e propio piscadonan como e pueblo cu ta cumpra pisca y doñonan di boto.
Nos no por a scucha ningun di dos mandatario menciona e ‘mega debe’ cu semper nan ta uza como excuus of e 2.7 miyon florin aki no ta parti di e mega debe cu nan kier purba di bende pueblo, cu nan presencia y nan sonrisa nan ta confira maneho y vision di gabinete Mike Eman, pues cu e alegria den nan cara ta mas cu claro cu nan a sostene e maneho di gabinete Mike Eman cu semper a uza fondo di pueblo pa pueblo y no fondo di pueblo pa amigo y sponsor manera e caso di huurmento di edificio na Pos Chikito.
Banda di esaki tambe tabata tin e entrega ofical di e projecto di Smart Community, caminda por a mira e direccion y y vision di gabinte Mike Eman pa loke ta trata sostenibilidad pa nos dushi pida baranca, caminda un biha mas minister Otmar Oduber tabata presente pa corta sinta, loke ta di lamenta, ta cu e gobernante no tabata tin e grandesa pa reconose cu ta danki na gabinete Mike Eman awe nos tin un centro manera esaki cu den real time manera nso ta bisa na ingles ta duna pueblo e opccionan y posibildad nan cu ta exsistie pa loke ta trata construccion di vivienda.
Dentro di poco tambe lo tuma luga inauguracion di otro proyecto di gobierno di AVP cu ta e edificio di MFA na Santa Cruz, cu tambe a costa placa pero ta placa di pueblo cu ta bay bek pa pueblo, contrario na gobierno MEP-POR-RED cu ta bay ranca placa for di cartera di pueblo pa cumpli cu amigo y famianan, algo cu comision di supervision financiero y gobierno di Hulanda a hala atencion di nan riba esaki, Parlamentario Marlon Sneek a declara.
