Den presupuesto 2022 Gabinete Wever Croes a pone e suma cu nan tin intenciona pa bai busca bek serca empresanan chiquito den 2022 pa sumanan cu supuestamente nan lo a ricibi inhustamente na salrissubusidie. Bao di e descripcion “opvoeren terug te innen loonsubsidie” den cambio riba  prespuesto 2022 Gabinete Wever Croes a anuncia nan determinacion pa bai cobra empresanan chiquito e suma astronomico aki. 

Lider di Fraccion di AVP, mr. Mike Eman cu a questiona e asunto aki den Parlamento a elabora riba cifranan cu ta indica cu e cantidad di companianan cu ta bai wordo persigui ta hopi grandi mes. Eman a conclui esaki for di cifranan di Bureau Arbeidmarktonderzoek y contestanan di Minister Glembert Croes. Den e datosnan y contestanan di Minister di Labor e ta informa cu na 2020 un cantidad di 1888 empresa a ricibi demasiado loonsubsidie. E Minister ta bisa cu na 2021 e total lo tabata 1424 empresa.

For di cifranan di e mesun Minister por conclui cu na Aruba tin 3181 compania chiquito cu 10 of menos empleado. Esaki ta representa 83.3% di donjonan di trabao na Aruba segun e mesun Bureau Arbeidsonderzoek.

E lider di fraccion di AVP, mr. Mike Eman ta bisa cu si analysa e cifranan di e cantidad di empresanan chiquito (3181) cu 10 of menos empleado, representando 83% di empresanan na Aruba, anto e probabilidad ta hopi grandi cu un parti hopi grandi di 49 miyon cu Gabinete Wever Croes ta bai “in terug” lo ta principalmente di e companianan chiquito aki.

Mr. Mike Eman ta bisa cu tur e retonan cu companianan y pueblo ta pasando aden e ehecisio aki di bai forza e empresanan chiquito aki pa den un anja paga bek e sumanan aki ta bai ta un otro sla mas pa empresarionan chiquito na Aruba cu ta luchando pa tene nan cabez riba awa.

Eman ta bisa cu ya algun luna pasa a adverti pa e cobramento bek di loonsubsidie no bira algo semehante na e “toeslagenaffaire” na Hulanda caminda miles di famia a bira victima di abuso di poder di e burocracia. Awor cu Gabinete Wever Croes a presupuesta 49 miyon como entrada pa 2022 e ta bisto cu ta bai tin un cobramernto feroz pa alcansa e suma aki. 

E lider di fraccion di AVP, mr. Mike Eman a expresa hopi preocupacion cu e desaroyo aki mirando cu riba tur front desaroyo social-economico di Aruba ta debilita y cada vez tin mas medida cu ta afecta poder di compra di pueblo, gastonan di compania y ciudadania. Den e Prespuesto Alternativa pa 2022 e fraccion di AVP a presenta diferente alternativa pa cambia e rumbo aki di gobernacion.   

ta aki e Bureau ta raporta cu na Mei 2020 un total di 1661 donjo di trabao a haya loonsubsidie.