Miembro di fraccion di AVP den Parlamento, sr Robert Candelaria, a mustra durante conferencia di prensa cu tin hopi ta bisa cu e gobierno actual no a logra nada desde cu nan a tuma rienda over di AVP y cu den cierto sentido, esey ta berdad ya cu fuera di medidanan cu gobierno a introduci, practicamente ningun hende sa kico ta nan plan pa yuda Aruba, te na por mira resultado positivo di nan maneho.
Sr Candelaria a sigui mustra cu kico gobierno kier haci pa hiba nos pais dilanti, ta desconoci pa nan mes, pues logicamente pa tur hende tambe y caminda tur projecto cu nan a inaugura te cu awe, ta di e gobierno anterior ya cu no tin creatividad ni positivismo den e gobierno aki.
“Sinembargo tog e ponencia cu gabinete Wever Croes no a logra nada te ainda, no ta completamente berdad. Den apenas 8 luna di gobernacion nos por mira cu gobierno a logra hopi. MEP y su partnernan den coalicion a logra demostra cu nan ta bai sigui di ta un gobierno di medida, un gobierno di persecucion y cu ta goberna mirando den spiel patras. Nan no tin un vision cla pa Aruba, pa unda nan lo kier hiba e pais aki den e periodo breve di gobernacion cu pueblo a duna nan.
Ta bon pa reparsa un rato algun logro di gabinete Wever Croes:
Na prome luga tin un presion sin presedente riba nos institutonan hudicial y riba empleadonan publico. Desde inicio di gobernacion, nos por a mira con ministernan a impone influencia riba funcionarionan di Ministerio Publico y polis pa asina move nos cadena hudicial pa yega te na detencion di un persona completamente contra tur procedura normal den casonan hudicial, pa un supuesto caso di ladronicia di material di gobierno. Hopi lihe a resulta cu tabatin intento di manipulacion di e sistema hudicial cu a conduci cu a laga e hoben den libertad y bay over na cera e caso.
Esaki tabata e prome señal cu e minister encarga cu cartera di husticia, aunke e ta un hurista, no ta domina e materia ni e tin suficiente conocemento di materia con pa guia proceso den e ministerio di husticia. Tampoco e no por stop otronan den su gobierno di interferi den casonan hudicial.
Husticia ta algo cu ta bon regla den ley. Minister di husticia ni gobierno mag mishi cu casonan hudicial directamente. Banda di habri un bariopost existente na San Nicolas cu ta nada mas y nada menos c’un oficina di un barioregisseur, no tin ningun logro positivo den husticia. Djis mas persecucion incorecto di hende, creacion di intrankilidad y mal contento di tur departamento. Y nos no por lubida cu e minister kier bin c’un fast ferry.
Un otro logro di gobierno ta di kibra e promesa cu lo respeta institutonan den nos comunidad. Mi a manda diferente carta pa ministernan den gobierno cu te dia di awe no a wordo contesta.
Pa menciona algun, e carta cu preguntanan manera cuanto hende gobierno a tuma den servicio, den cua funcion, cuanto ta paga nan, cua abogado y consehero gobierno a tuma den servicio, nunca mas no a wordo contesta.
E carta over contrabanda di oro y e cordinador di campaña di prome minister y e posibel lasonan cu por tin entre e empresa y actual prome minister tampoco no a wordo contesta.
Peticion pa aumenta siguro pa ambtenaren cu haya un accidente riba trabou cu fayece of keda incapacita pa traha, tampoco a wordo contesta.
Nos fraccion a yega di pidi pa reunionnan publico den Parlamento y no a haya esakinan.
Tur esaki ta muestra di un gobierno cu no tin niun respet ni pa Parlamento mes, siendo cu ta nan mes a priminti na pueblo cu nan lo respeta Parlamento y otro institutonan.
Pero asina tin hopi ehempel mas di e gobierno cu a priminti cu lo a goberna sin medida, lo a baha edad di pensioen pa pueblo etc. Tur esaki a resulta di ta mentiranan structural, djis pa por a drenta gobiernacion.
Nos a mira con recientemente minister Dangui Oduber a ataca nos huesnan y bisa cu nan ta ‘politiek verziekt’ ( malesa di politica). Nos sistema hudicial ta ancra riba e confiansa cu nos como pueblo tin den dje. Sin confiansa e no por funciona. Con por ta posibel cu un minister cu mester duna ehempel di bon conducta y respet y contenido na trias politica ta ataca nos hueznan?
Corectamente prome minister a hala su atencion, pero como prome minister bo no por keda core ta hala atencion di bo ministers riba cosnan fundamental.
Minister Glenbert Croes tambe a sali bisa cu lo aumenta minimumloon, y atrobe prome minister mester a sali y skwal su minister y bisa cu e aumento ei lo no pasa y cu minister Glenbert no ta compronde e materia. Lamentablemente tin hopi mas cos cu prome minister mester ta coregiendo cu e no ta hasiendo, pero su trabou no ta pa babysit su gabinete, pero pa dirigi su gabinete. Falta di respet pa Corte no mag tuma luga den un pais democratico, pero lamentablemente e ta pasando keto bai,” Parlamentario Robert Candelaria a mustra.
