E siman aki partido AVP ta bolbe gara e gobierno actual den un gañamento na pueblo; loke a bira un custumber ya pa un aña caba. Durante e conferencia di prensa semanal di Partido di Pueblo Arubano, Parlamentario Benny Sevinger a enfoca parti di su presentacion na e biahenan cu miembronan di Gabinete Evelyn Wever-Croes ta haci durante nan prome aña di maneho. Pa Sevinger ta incomprendibel con Ministernan cu nan trabou primordial ta den exterior, ta hustamente esun cu menos a biaha; mientras cu otronan cu nan esfuerso mester ta riba e isla mes, ta esunnan cu te hasta dos bes pa luna ta den exterior.
Pa cuminsa Sevinger ta recorda cu entre e tantisimo promesa falso haci durante campaña, partido MEP a bisa di lo baha biahamento di ministernan pa asina baha gasto. Awo cu ta sinta den Cocolishi, e realidad ta completamente otro. Pa compronde e situacion bon, e Parlamentario a bisa cu di 365 dia cu tin den un aña, ta saca afo e 30 dianan cu Minister tin vakantie, 11 cu ta dia di fiesta y fin di siman cu 104, y asina ta resta 220 cu un minister tin den aña pa traha.
Como regla, e minister mester notifica Parlamento ora cu e ta biaha, pa cuanto dia y pakico. Y a base di esey, tabata un sorpresa di tuma nota cu Dangui Oduber, titular di turismo, e minister cu pa definicion mas tin cu biaha, ta esun menos tabata den exterior. Ta esencial pa e Minister di Turismo bishita feria internacional y congreso di e industria, pero tambe tene encuentro individual cu companianan aereo, di crucero, hotelnan, etc. Sinembargo, Minister Dangui Oduber a biaha solamente 28 dia. E dato aki ta lagabo cuestiona con involucra e por ta den e maneho di turismo. “Abo ta esun cu ta supposed di biaha pa propaganda Aruba.”
Di mesun manera Sevinger a menciona con Minister di Husticia a realisa un total di 8 biahe cubriendo 32 dia di trabou, Minister di Infrastructura a biaha 11 biaha, dus aproximadamente 1 bes pa luna cubriendo 54 dia di trabou y Minister Rudy Lampe di Enseñansa tabata afo pa 66 dia di trabou reparti den 9 biahe pa exterior. Kier men, e ultimo aki tabata ekivalente na dos luna completo pafo di Aruba.
Pa loke ta trata Minister Xiomara Ruiz-Maduro, e titular di Finanzas a biaha nada menos cu 13 biaha durante 2018, loke ta nifica por lo menos un bes pa luna y 80 di su 220 dia di trabou e tabata den exterior; casi un tercer parti. Lider di e gabinete, Evelyn Wever-Croes di su parti no a keda atras; y mientras e tabata keha constantemente di presencia di ex Prome Minister Eman su presentacionnan den exterior, den 2018 el a biaha den 16 oportunidad pa un total di 90 dia pafo di Aruba. “Awo ta compronde dicon e pais aki no ta bay dilanti y no tin prospecto,” segun Benny Sevinger a indica.
Pio ainda, segun e Parlamentario di AVP, ta e Minister di Asuntonan Social; esun encarga di combati e crisis social cu tanto e Gobierno di coalicion ta papia di dje. “Pero e ta mas afo cu e ta na Aruba,” Sevinger a bisa indicando cu Glenbert Croes a biaha 13 biaha permaneciendo un total di 126 dia den exterior y apenas 94 dia di trabou riba e isla mes. E ta puntra su mes ta con serio e gobierno aki ta den su mision pa alivia e problemanan social di nos pais.
Pero esun cu ta bay cu e premio mes ta Minister di Agricultura y Transporte, Chris Romero kende a biaha nada menos cu 19 biaha; loke ta un promedio di 1.5 biaha pa luna y practicamente cada dos siman e tabata pafo di Aruba. Un total di 129 dia di trabou Minister Romero tabata den exterior. Kico tanto un Minister di Agricultura tin cu haci pafo di Aruba?
Den resumen Gabinete Evelyn Wever-Croes a biaha 605 dia den 2018 gastando e suma di 3 miyon Florin. “Esaki ta e Gobierno cu ta bisabo cu mester paga debe, cu no tin placa pa drecha scol y no tin placa pa Polis pa gara atracadonan, pero si tin 3 miyon Florin pa biaha,” e Parlamentario a comenta.
Awo, esey ta sin conta e hendenan cu ta biaha cu e ministernan. Riba media social no ta sconde tampoco pasobra poco dia por a mira con nan a bay concierto y te hasta ruman a bay. Esaki ta e realidad anto poco poco ta cuminsa sali na cla. Sevinger a splica cu fuera di e fechanan cu Ministernan ta declara na Parlamento, tin tambe e biahenan cu core haci den fin di siman, ora nan ta subi den avion priva pa bay Miami y sinta na Watson; di cual e Parlamentario a bisa di tin te hasta grabacion di negociacionnan haci cu ministernan.
“Nos trabou ta informa pueblo y habri pueblo su wowo. Ta gaña comunidad den eleccion y priminti monton di cos, pero awo ta haci lo contrario y nan ta sorprendi cu pueblo ta reclama ora ta topanan riba caya,” Sevinger a bisa durante conferencia di prensa indicando cu e biahenan aki ta un di e motibonan pakico nan a gasta mas di loke nan a presupuesta y CAFT mester a hala nan horea.
