Ex director di TNO Aruba, Jan Ebbing tabata presente durante e conferencia di prensa den cual Fundacion Mito Croes a anuncia e simposio cu e lo duna e siman aki. Ademas di expresa su satisfaccion di ta bek na Aruba, confesando cu el a haya falta di e isla, Ebbing a indica cu e propuesta di colaboracion entre ambos pais den reino ta mas vigente y fertil cu nunca. “Ta lamentabel cu a esaki a keda para pa 6 pa 8 aña,” a comenta.
A duna e simposio e nomber di 2.0 hustamente pasobra kier reactiva loke a inicia un tempo caba y a desaroya exitosamente entre 2010 y 2017; relacionnan den reino y specificamente basa den contexto di oportunidad strategico. Ebbing a fungi como e kwartiermaker, esun cu a encamina e proceso pa TNO establece.
TNO tabata djis un di varios instituto Hulandes cu a mira e potencial di un aliansa cu Aruba durante gobernacion di Gabinete Mike Eman I y II. Otro cu por menciona ta Scheepvaartschool Rotterdam, Phillips, Rietveld Academie y GasUnie. Aruba tabata representa un brug pa mundo, cu un clima perfecto den tur sentido di palabra, pa ilustra e conocido y tecnologia na mundo.
E posibilidad di retoma e direccion di colaboracion estrecho cu Hulanda na fabor di Aruba ta ta mas importante awe cu e tempo aya, segun Mike Eman, lider di Partido di Pueblo Arubano, AVP. “Nos ta para dilanti di reto grandi pa desaroyo di nos pais y mundo. Nos a pone un vision pa convence Hulanda pa converti e debe di Aruba di 900 miyon florin den un fondo di inversion riba, entre otro, sostenibilidad. Pa nos por logra realisa e vision nos ta bay tin mester di asocia cu instituto cu por yuda nos pone tur argumento hunto,” asina Eman a splica.
John Hart, president di Fundacion Mito Croes a comparti cu e simposio di e siman aki ta un di varios cu ta trahando riba dje. Pa awo, ta invita un y tur pa asisti diahuebs awo 25 di april pa 7’or di anochi na Marriott Courtyard caminda entrada ta gratis.
Adicional na e presentacion di Ebbing, lo tin participacion tambe di Aad Jan de Gruijl kende lo papia riba Fintech of riba tecnologia financiero cual ta un tema importante pa empresarionan hoben di nos isla. De Gruyl lo presenta punto di salida y oportunidadnan den nos region y den reino.
