E Directiva nobo di Fundacion Digna Laclé-Herrera (FDLH) a anuncia un cyclo di cursonan nobo “Formacion Politico”. E Presidente nobo di FDLH, Ichelle Oduber Simon a mustra cu e serie ta cuminsando den luna di september y cu e lo ta habri pa publico en general y ta liber di preferencia politico.
Lider di Partido di Pueblo Arubano (AVP), mr. Mike Eman a comenta cu ta mira un e necesidad pa haci e curso mirando e gran interes cu tin den comunidad pa cu esaki. E ta contento di mira cu e directiva nobo di e fundacion a logra traha riba un programma amplio y cu docentenan academico altamente hopi capacita riba nan tereno. E prome anochi den e serie ta programa pa tuma luga dia 21 di september y lo continua un bes pa siman te cu fin di november, pa un duracion di 12 siman.
”Pa AVP ta hopi importante cu tin dos fundacion cu e partido ta prepara cu ne pa futuro, uno ta esun cu ta haci studio pa defini meta y punto di maneho cu ta Fundacion Mito Croes y esun aki (Fundacion Digna Laclé-Herrera) pa organisa curso pa prepara esunnan cu tin interes den servicio publico,” asina Eman a expresa bisando acerca cu “pa haci esey na e nivel cu e comunidad mester, ta importante pa esunnan cu ta tuma e reto, tin e conocemento di con e parlamento, economia y sociedad ta funciona.”
Otro miembro nobo di e Directiva, Dennerich Kelly, a duna schedule y contenido di di e cursonan. Topico di e prome siman lo ta Finanzas Publico duna pa mr. Angel Bermudez, sigui pa Tumamento di Decision (Decision Making) presenta pa dr. Tico Croes dia 29 di september. E siguiente fechanan 4 y 12 di october riba cual mr. Luciano Milliard lo duna Introduccion na Derecho Constitucional (Staatsrecht) y Derecho Administrativo (Bestuursrecht) respectivamente.
Djey ta sigui Derecho na Enseñansa duna pa drs. Rene Herde dianan 19 y 26 di october, sigui pa Economia di Aruba door di drs. Sharon Erasmus dia 2 di november. Mr. Gerric Croes lo presenta Belasting/Impuesto riba dianan 9 y 16 di november, sigui pa Carl Giel riba e tema di Derecho Laboral, culminando cu mr. Mike Eman dia 23 di november cu un curso riba Ideologia Politico.
President di Fundacion Digna Laclé-Herrera, Ichelle Simon-Oduber a expresa durante e anuncio cu e obhetivo ta pa expande conocemento, pero tambe pa haci nos comunidad prepara pa e reononan di mayan. “Nos directiva ta keda sostene e vision di defunto Digna Laclé-Herrera cu e generacion cu ta bin por duna mas contribucion hunto cu esunnan experiencia caba pa haci cambio y logra cosnan grandi pa nos pais.”
Tur anochi di curso ta cuminsa pa 7’or na Cas di Partido na Playa. E fundacion kier pone enfasis riba e echo cu tur curso ta habri pa tur publico. Por registra caba pa e serie completo pa un contribucion hopi accesibel di solamente 25 florin. Ta pidi tur interesa pa manda un email na e adres nobo di e fundacion, esta [email protected].
