Siman pasa parlamento di Aruba a aproba presupuesto 2018 di pais Aruba, cu 12 voto na fabor y 8 voto contra y asina por bisa cu e tres fraccionnan cu a sostene gobierno, a oficialisa e pakete di Benny Sevinger di fraccion di AVP ta mustra cu ta trata di un presupuesto cu no ta cumpli cu leynan di CAFT y tampoco ta cumpli cu promesanan cu politiconan di MEP a priminti pueblo durante di campaña electoral.
E miembro di fraccion berde a mustra cu den presupuesto 2018 no por a mira algun caminda algo cu ta bay beneficia pueblo, algo cu por alivia e peso pa hopi y hasta e promesa di baha edad di pension, di duna pensionadonan algo extra dor di introduci un prima mas abou, no ta alcansabel ya cu ningun caminda ta pone con a bay haya e placa aki.
“Cu aprobacion di presupuesto 2018 e tres fraccionann cu a sostene gabinete Oduber Croes, a oficialisa e pakete di medida y asina sigui cu un di e tradicionnan di partido MEP cu ta medida, persecucion politico y tuma friends & family den servicio di gobierno y asina sigui aumenta debe.
Por ehempel ta tuma medida, apesar cu nan a bay eleccion bisando pueblo cu tin un mega debe y cu nan lo bay soluciona esaki sin medida pero asina cu nan a drenta gobierno e prome cos cu nan a haci, ta oficialisa medida manera AZV, BAZV, BBO, hisa accijns riba gasolin, impuestonan ta bay subi, permisonan ta bay subi y tur esakinan ta medida cu lo bay bin ainda pa pueblo.
MEP simplemente a gara e cos di mas facil, esta bin cu medida y pueblo tin cu paga y si nan ta bin cu medida cu pueblo ta paga y nan ta bay haci loke nan ta bisa, esta paga e debe cu’ne ta otro cos pero loke nos por mira durante tratamento di presupuesto cu no ta bay paga debe, al contrario ta bay aumenta e debe.
E gobierno aki a bisa Parlamento cu su entradanan ta menos cu su gastonan pero loke e ta haci ta cu tur dos banda, dor di aumenta su entradanan dor di introduci diferente medida pero di otro banda ta dobel su gastonan dor di tuma hendenan den servicio, dor di duna e minister di infrastructura 20 miyon pa bay haci show cu’ne, dor di duna otro minister 18 miyon pa tambe haci show cu’ne, dor di bin cu diferente post pa biaha, pa ‘deskundig advies,’ huurmento di edificio tur esakinan ta den e presupuesto.
Gobierno ta bisa pueblo cu e ta tumando medida pa paga debe pero di otro banda nan ta aumenta e debe dor di bin cu gastonan extra, tuma gran cantidad di trahado ya cu den e prome 5 luna di e gobierno aki, a tuma mas di 100 persona mas di loke nan a hay’e na final di gobierno di gabinete Mike Eman II, y si gabinete Oduber Croes a kita 300 hende for di servicio di gobierno na fin di aña y na comienso di aña bo tin 100 mas compara cu e gobierno anterior, ta confirma cu den apenas di algun luna gobierno a tuma mas cu 400 hende den servicio di gobierno.
Anto net e gobierno aki kier papia di mega debe, ministernan kier papia di medidanan ta necesario, pero esaki no ta nada necesario, esaki no ta loke pueblo a spera di un gobierno cu a priminti asina hopi,” Parlamentario Benny Sevinger ta mustra.
