E belasting nobo cu Gobierno a introduci pa paga proyectonan PPP tin tur e caracteristicanan di un ‘bestemmingsheffing’, asina Parlamentario mr. drs. Richard Arends (AVP) a declara. Esaki ta encera cu mester aloca e entradanan di e impuesto aki exclusivamente pa e meta stipula, manera ta e caso p.e. cu BAZV cu ta bay directamente pa e fondo di AZV. Si mira e gastonan nobo di Gobierno den presupuesto 2018, e entradanan di e ‘coalitieheffing’ ta destina principalmente pa financia maneho nobo. Alocacion di e fondonan aki pa cubri otro gastonan ta mina e legitimidad di e impuesto nobo aki, segun Parlamentario Richard Arends.
Na momento cu a introduci un impuesto pa cubri specificamente gastonan di PPP, Gobierno ta obliga di gasta tur e fondonan aki pa cu proyectonan di PPP. P’e aña aki e gastonan di PPP ta 40 miyon y e aumento di BBO ta aporta cu 90 miyon pa aña. E pregunta cu ta bin dilanti ta unda e diferencia den entradanan ta bay? Durante tratamento di presupuesto, por a constata un aumento drastico y extensivo di gastonan: 125 miyon mas compara cu realisacion di aña 2017. E peso adicional riba e cartera di ciudadanonan y di empresanan ta pa por cubri gastonan excesivo di Gobierno y no unicamente di gastonan PPP manera cu a wordo presenta.
Na momento cu coalicion a cambia e nomber di e impuesto nobo pa BAVP, Gobierno a laga politica drenta den un area unda politica no ta pertenece. “Gobierno a laga consideracion partidista drenta den un area exclusivo di administracion di empresanan unda obhetividad y seriedad mester prevalece. A atacha integridad nos sistema fiscal y structura di impuesto,” Parlamentario Richard Arends a bisa. Fraccion di AVP ta lamenta hecho cu a habri porta y laga politica drenta den un caminda cu no ta su luga y a vocifera e desaprobacion categorico durante e tratamento di e ley.
Un accion asina no solamente e ta crea segregacion den nos comunidad, pero e ta crea division y ta haci e polarisacion politico cu ta existi den nos pais hopi mas skerpi cual ta algo cu na aña 2018 no mester existi mas, asina Parlamentario Richard Arends a motiva su voto durante reunion di Parlamento. Fraccion di AVP a condena esaki y p’e motibo aki ta lamenta cu Gobierno a opta asina mes pa yama e impuesto nobo aki BAVP. Segun Parlamentario Richard Arends, un accion asina ta afecta credibilidad di nos isla y siguridad di nos clima di inversion. “Inversionistanan lo no core kier riesgo haciendo inversion den un pais unda Gobierno ta laga politica partidista drenta den su sistema fiscal,” asina Richard Arends a termina bisando.
