Parlamentario drs. Mervin Wyatt-Ras ta trece padilanti cu durante un dia cu diferente reunion, fraccion di AVP a entrega un carta cu peticion pa yama un reunion publico encuanto di e medida di eigenbijdrage y austerisacion di lista positivo di remedinan.
Wyatt-Ras ta sigui menciona cu parti mainta a reuni cu tres instancia regardando criminalidad y castigo pa hobennan(jeugdstrafrecht). A reuni cu KIA, Stichting Reclassering en Kinderbescherming y Sociale Zaken.
Aki cada instancia a duna nan presentacion.
Prevencion ta keda e yabi importante pa evita cu hobennan ta cai den e trajecto judicial y sigui den e trajecto aki. Ta necesario pa Hueznan tene cuenta cu circumstancia individual di hobennan ora di castigo. Castigo mas halto no ta garantisa cu e hoben no ta bolbe comete actonan di criminalidad.
Hobennan bou guia di Reclassering pa 50% ta dropouts y 65 % ta bin di famianan di un solo mayor of mayor soltera(o). Ta haci uso mas y mas di sanccionan alternativo entre otro trabou pa comunidad. Tin ademas castigo di trabou y leerstraffen.
Wyatt-Ras ta haya necesario cu ta haci un investigacion di e tipo di problematica cu ta haci cu e hobennan ta drenta den e circuito di criminalidad. Uzo di droga tambe ta un aspecto. Paso ora nan sali bek y bai den nan famia cu e mesun problematica ta cai bek. Tin di e mayornan tambe ta den criminalidad of ta bende droga dor di cual e hoben cu no por haya trabou dor di stigmatisacion tambe ta sigui den mesun patrol hi y ta bai bende droga of anda cu mesun amigonan cu ta influenci’e negativo y push’e bek den criminalidad.
Necesario segun Wyatt-Ras ta registracion di muchanan den categoria di risico y monitorea nan. A inverti 36 miyon florin den un Crisisplan pero no a haci nada na registracion y ni cooperacion entre instancianan.
Ta necesario pa instancianan sali for di nan isla y uni mas cu otro pa por atende e problematica di nos hubentud. Ta necesario pa nos comunidad cambia su forma di pensa pa loke ta trata hobennan cu a haya nan mes confronta cu justicia. Mester kita e stempel/stigma ariba e hoben.
Den KIA ta necesario mas atencion pa e hoben y su necesidadnan, mas profesional specialisa riba e tereno di hubentud y opleiding pa forma hobennan den bon direccion.
En bista cu gastonan pa un hoben ta ser deteni y permanence den KIA ta casi 100.000 ta necesario y urgente pa inverti den prevencion enbes di laga yega asina leu cu hobennan ta end up den KIA.
E di dos reunion cu a inicia atardi, tabata referente e relatonan di e reaccionan y preguntnan di diferente fraccion riba e dos leynan di reino RAft y COHO. Parlamento lo manda nos reaccion pa Hulanda. Ta lastima cu Hulanda a duna asina tiki tempo pa bin cu reaccion. E leynan di Reino menciona ta mina autonomia di nos pais y ta haci nos rol como parlamento uno swak y insignificante. Nos fraccion ta contra di ambos ley.
A conclui e dia cu e reunion cu director y profesionalnan di AZV tocante nan relato financiero, eigenbijdrage y positieve lijst. Durante e reunion Wyatt-Ras a trece padilanti cu awor cu entrada di AZV, despues di e temporada di COVID, a cuminsa aumenta dor cu mas hende tin empleo y e entrada di primanan y BAZV a aumenta, por tene cuenta cu nos pueblo cu no tin pan ni pa come y cu costo di bida halto pa no tuma e medida mas. E medidanan aki di tres wave lo ensera cu ora un cuidadano cu ya no tin suficiente placa den su cartera yega na Spoedeisende Hulp e lo mester paga 15 florin. Ora e yega Huisarstenpost e tin cu paga 15 florin. Na specialista e lo paga 5 florin, na botica 2 florin pa cada receptregel y na laboratorio 1 florin pa casa test. Si suma esakinan ta hopi e pashent mester paga.
Wyatt-Ras a tuma nota di declaracion di director di AZV encuanto cobramento di BAZV y e ta urgi tur hende pa pidi nan recibo of slip ora nan paga pa yuda cu control di pago di BAZV. Aki sigur cu lo por haci mas segun Wyatt-Ras pa haya entrada pa AZV dor di cual no mester bai over na mishi cu cartera di nos cuidadanonan cu ya caba ta bashi. Tambe segun Wyatt-Ras mester por busca otro formanan pa mehora y corta vet otro caminda, p.e. pa haci compra central di medicina, pa mihor cooperacion y referencia di pashentnan pa evita cu mucho liher un pashent ta pasa pa tweede lijn. Tambe por evalua e estadia di pashentnan den exterior di cual un cantidad ta keda mucho dia, hasta lunanan y anja den exterior sin ricibi tratamento. Nan tin cu keda warda ayanan prome cu haya cuido.
Wyatt-Ras a puntra tambe tocante sociaal vangnet y si AZV ta na haltura si lo bin un vangnet social pa esnan di menos recurso. Ademas el a cuestiona cu no ta tene cuenta cu stakeholders cu a trece padilanti na Parlamento y. Minister cu nan no ta equipa pa cobra pashent nan cual ta trece cun’e extra trabou administrativo y preocupacion cun’e. Tin cu evita klassezorg y cu cuido ta bai atras netamente awor cu covid a trece cun’e diferente consecuencianan negativo di salud pa e pashent.
Wyatt-Ras a menciona alabes cu Raad van Advies ta cuestiona cu no ta aclarea con introduccion di eigenbijdrage lo tin un remmende werking riba crecemento di gastonan di cuido. Ta ser menciona cu gobierno ta conciente cu di loke ta ser menciona den literatura cu eigenbijdrage por conduci na zorgmijding. A pidi aclareacion riba esaki.
Wyatt-Ras ta trece dilanti cu ya caba e landsbesluit pa regla e medidanan di eigenbijdrage y austerisacion di lista positivo di remedi a drenta Parlamento y segun ley lo mester keda den parlamento pa 2 siman y despues di 2 siman e landsbesluit lo ser ehecuta. Fraccion di AVP ta haci un peticion na presidente di parlamento pa yama un reunion publico den presencia di minister di salubridad pa por discuti tocante e LB.
Ta importante pa pueblo ta na haltura di e medidanan di eigenbijdrage y austerisacion di e lista di remedi cu gobierno lo impone y sin ningun sosten pa esnan mas vulnerable den nos comunidad. Fraccion di AVP no ta di acuerdo pa introduci e medidanan aki. No por saca mas for di cartera di nos cuidadanonan.
