Fraccion di AVP a reuni diaranson mainta na Directie Financien cu representantenan di Standard & Poors – e agencia internacional di evaluacion di credito y solvencia — kendenan ta haciendo nan evaluacion riba e desaroyo economico y financiero di Aruba. Durante un declaracion breve, miembro di fraccion di AVP, mr. drs Richard Arends a duna un informacon con e reunion aki a bay.
“Manera ta semper e caso, agencianan di evaluacion manera Standard & Poor’s y FitchRatings, ta invita e partido mas grandi den oposicion pa intercambia di opinion y idea riba desaroyo di nos isla. E aña aki no tabata un excepcion y un delegacion di fraccion AVP a wordo invita pa un encuentro cu Standard & Poors cu ta den un ronda di evalucaion pa midi e abilidad di pais Aruba pa cumpli cu su debenan.”
Nos a toca temanan manera e metanan cu gobierno tin pa su mes pa loke ta trata presupuesto 2019 pero tambe perspectivanan economico. Di un manera hopi consecuente, nos a ilustra nos preocupacion pa e aumento di impuesto despropocional y e aumento di gasto manera cu CAFT caba a indica. For di 2017 e impuestonan adicional ta suma na 270 miyon; e gastonan pa aña 2018 y 2019 a aument acu 130 miyon di florin.
Nos a tuma nota caba cu tin algun entrada cu lo no materialisa nan mes pa aña 2019 y cu esaki lo por resulta den un deficit adicional y gobierno no tin un perspectiva ni un plan con nan a bay deal cu esaki, ni tampoco con lo realisa e perspectivanan economico.
Un plan economico hopi bunita a wordo entrega ‘cu man rechts’, mientras cu ‘e man links’ ta hibando un maneho contrario cu tin como consecuencia cu e metanan economico lo no wordo realisa, aunke con conservativo esaki ta di 1%, Parlamentario Arends a ilustra figurativamente.
Si bo wak e resultado di diferente encuestanan di cu Banco Central a hiba riba e perspectivanan den e temporada nos dilanti di consumidornan, como tambe empresanan, no por conclui otro cu lo tin un contraccion economico den proximo añanan cu lo resulta den un recession. Pa motibo cu a saca 270 miyon di nos economia, dificilmente lo por yega e metanan economico cu tin y consecuentemente tampoco e metanan financiero.
Esaki ta un revision cu ta tuma luga anualmente y oposicion a wordo invita mescos cu tur otro gremionan pa duna nan punto di bista riba e situacion financiero-economico di Aruba y den e reunion aki no tabata diferente y fraccion di AVP a trece su inkietudnan dilanti pa e incertidumbre cu e maneho financiero-economico di Gobierno ta treciendo cun’e,” Parlamentario Richard Arends a declara.
