Despues di a ricibi e concepto di presupuesto 2018 di pais Aruba pa den un lapso di un siman pf formula pregunta na Gobierno, diabierna mainta fraccion di AVP a entrega un lisa di 997 pregunta na Presidente di Parlamento.

Studiando y analisando e concepto di presupuesto 2018, miembronan di fraccion  di AVP a analisa y studia e documento aki y a manda pidi claridad riba diferente punto y aspecto di e presupuesto, pa asina haya mas claridad riba e maneho presupuestario di gabinete Wever Croes.

Contrario na loke tabata sosode ulimo añanan caminda fraccionnan den oposicion tabata ripiti preguntanan haci añanan anterior y sin haci un esfuerso pa cumpli cabalmente cu nan responsabilidad, fraccion di AVP a cumpli cu su responsabilidad y a formula e total di 997 pregunta riba e maneho financiero stipula pa 2018, caminda gobierno no ta mucho cla cu e maneho cu e kier a hiba.

Un aspecto cu fraccion di AVP kier a haya mas claridad y splicacion di gobierno ta relaciona cu e traduccion di e maneho di gobierno relaciona cu e cifranan cu a wordo presenta y cual ta totalmente ausente den e presupuesto presenta na Parlamento.

Claridad tambe fraccion di AVP ta desea di ricibo for di gobierno e situacion cu a presenta den e prome 150 dianan di e gobierno di coalicion caminda por mira un minister ta tuma decisionnan riba maneho di ministerio cu no ta cay pa su responsabilidad.

Aki por menciona entre otro e asunto di ‘fast ferry’ caminda minister di Husticia, Andin Bikker tabata e mandatario cu a presenta su mes como e ‘autor’ di e proyecto aki, mientras cu esaki no ta parti di e ministerio di husticia.

Tin otro casonan manera por ehempel desaroyonan na e planta televisora nacional Tele-Aruba, caminda decision-  y nombracionnan a tuma luga cu e minister encarga cu e maneho di e planta televisora, esta Chris Romero  no tabata na altura di esaki y loke el a confirma den declaracion cu el a duna na prensa e siman aki.

Asina tin mas casonan caminda claramente por a tuma nota cu un ministerio cu no ta encarga cu maneho di cierto ministerio, ta sali dilanti   y tuma decisionnan cu no ta regarda su responsabilidad.

Otro aspecto cu fraccion di AVP a pidi claridad ariba y cu no ta wordo refleha den e presupuesto presenta, ta  di ministerionan cu ta super grandi pero riba cual practicamente no por haya informacion pa motibo di e situacion aki.

Tin minister cu tin un post di 10 miyon florin y cu no ta wordo informa y aclaria na kico e placa aki lo wordo uza of si tin un proyecto relaciona cu e suma aki.

Pues tin cantidad di puntonan cu falta di aclaracion y splicacion di parti di Gobierno pa loke ta presupuesto 2018 y pa cual motibo fraccion di AVP a logra di entrega un serie largo di pregunta riba e maneho financiero di gobierno pa 2018.