Te ainda mi no por caba di compronde con Parlamentario Endy Croes, despues di a haya tanto veredicto den su contra, den tur nivel di Corte na Aruba y den Caribe Hulandes, cu ainda e tin curashi di cuestiona Lotto.
Mi ta sinti cu ainda e Parlamentario condena aki no ta realisa cu tur e adaptacionnan den e fundacion ta precisamente pa haci’e “Endy Croes Proof”, pa evita cu atrobe e lo mal maneha e fundacion y saca 5 miyon florin pa negoshinan di su mesun famia.

Awor cu tin caso den Corte dialuna 22 di januari, ta bon pa para keto riba por lo menos un di e documentonan relaciona cu e caso aki. Esta, si ta den tempo di campaña a core cambia statutonan of si a haci esaki for di prome caba. A bin topa cu un e-mail di Ronald “Boracho” van den Berg, Director di Lotto, cu dia 20 di december 2010 caba a manda pa oficina di Notario Yarzagaray, pidiendo pa cambia statutonan di Fundacion Lotto pa Deporte.
E tempo ey caba a pidi pa cambia cu Minister di Finansa ta maneha e loteria en bes di Minister di Deporte. Tambe a nota cu a pidi pa haci cambio den e meta di e fundacion y asina por sigui menciona.

Bisando esaki, ta hopi obvio cu e intencion pa adapta e statutonan y haci nan mas moderno no ta algo cu a sosode di un dia pa otro, sino ta un trayecto cu a cuminsa encamina desde 8 aña pasa caba.
Cu awor, Endy Croes a gana 1 caso contra un compania priva, no ta liber di tur e otro casonan y di tur e otro condenanan cu el a haya pa mal maneho y pa enrikeciendo personal y di su famia. Ta haci comosifuera cu e un caso aki a liber di tur su picanan, di e hecho cu a cere dianan largo, cu e falsificacion di recibonan di Kooyman y sin lubida di computernan y documentonan cu a dera despues cu a suspende nan for di Lotto.

Ta di spera cu durante e caso sumario di dialuna, cu Hues compronde e peliger cu ta existi si laga Lotto den man di e mesun grupo aki cu a demostra cu ta di esaki nan ta biba, di fondonan publico. Ya caba famia a cuminsa limita nan negoshinan pasobra ta premira cu drentamento den Lotto bek lo ta dificil.