Parlamentario pa fraccion di AVP, Sr. Richard Arends, a para keto un rato na loke ta e ‘bestemmingsheffing’ Belasting Additionele Voorzieningen PPS-projecten (BAVP) cu Gobierno actual a introduci na aña 2018. Esaki lo tabata un impuesto temporal y exclusivo pa paga proyectonan cu a wordo cataloga como ‘proyectonan di Gobierno anterior’. E proyectonan aki sinemabrgo tabata forma parti di e Plan di Inversion cu a inicia for di aña 2010 cu tabata tin como meta di crea cupo di trabow, mehora calidad di nos infrastructura y ciudadnan y tambe jumpstart nos economia despues di e recesion.
“Aruba conoce varios impuesto special, manera e.o. e toeristenheffing cu ta sirbi 100% pa cubri gastonan Aruba Tourism Authority y TPEF, como tambe BAZV como producto di Dialogo Social cu ta wordo cobra pa cubri fondonan di seguro medico exclusivamente. Ambos impuesto ta wordo cobra pa cubri un gasto specifico y no por wordo usa pa cubri otro gasto,” Parlamentario Arends a splika.
“Ora cu nos wak entradanan di e Belasting Additionele Voorzieningen PPS-projecten (BAVP) pa aña 2019, Gobierno a conta cu un entrada total di 106 miyon florin mientras cu e gastonan total di MFA, hospital, Green Corridor y tambe Watty Vos Boulevard ta suma na 73 miyon di florin, segun informacion suministra pa mesun ministerio di Finansa y Asuntonan Economico. Akinan nos ta wak cu na 2019, 33 miyon florin di entrada di BAVP ta wordo aloca pa otro gasto cu no ta regarda proyectonan PPP. Aki Gobierno ta violando un ley cu nan mes a crea”.
“Prome cu 2017 Gobierno ya caba tabata paga 40 miyon for di prespuesto na proyectonan PPP incluyendo esunan ehecuta prome cu 2009 sin un impuesto special pa cubri esaki. Ta sumamente cuestionable con Gobierno cu por paga 40 miyon florin di su mesun fondonan, ta ranca mas di 50 miyon di florin extra na un belasting special na 2019 y mas di 30 miyon na 2020 pa cubri otro gastonan siendo cu e gastonan di MFA, hospital, Green Corridor y Watty Vos Boulevard ta substancialmente mas abou.”
“Mescos cu e toeristenheffing y BAZV, e ‘Belasting Algemene Voorzieningen PPS-projecten” ta un impuesto special y exclusivamente pa por paga e gastonan di PPP. Den caso di ATA, na momento cu e toeristenheffing ta surpasa presupuesto di ATA y a cumpli cu rekisitonan di un buffer, e placa cu ta sobra ta bay bek pa pais Aruba. Cu BAVP esaki no ta e caso,” e Parlamentario a splika.
Algemene Rekenkamer tambe a trece e punto aki dilanti bisando den mesun rapport di proyectonan di PPP: “de belasting aditionele voorzieningen ppp projecten is als tijdelijke crisisheffing geintroduceerd en de opbrengsten zijn niet specifiek geoormerkt.” Aki Contraloria General ta bisa cu e entradanan di e impuesto aki cu wordo aloca pa paga proyectonan PPP, pero e ta end up den e caha di Gobierno.
E grafico aki ta ilustra cu e impuesto specificamente crea pa cubri gastonan di proyectonan PPP — e asina yama Belasting Algemene Voorzieningen PPS-projecten of crisisheffing — ta surpasa e gastonan anual di e MFA-nan, renobacion di hospital, Green Corridor y Watty Vos Boulevard di forma substancial. Entradanan di un ‘bestemmingsheffing’ mester wordo aloca exclusivamente pa un gasto specifico, den caso aki e primanan anual pa e proyectonan PPP. Si Gobierno ta cobra un belasting pa PPP e mester bay pa PPP, mescos cu entradanan di BAZV ta bay pa AZV y e toeristneheffing pa ATA y TPEF.
