Gobierno a anuncia un serie di medida cu lo wordo cambia entrante diamars 25 di Mei caminda a dicidi di flexibilisa varios medida cu ta duna pueblo un tiki mas espacio, un tiki mas libertad pa move.
Marlson Sneek lider di fraccion di AVP a mustra diamars mainta cu gobierno un biaha mas ta tuma medidanan sin pensa mucho leu, sin mira kico ta importante y cual grupo e medidanan ta sigui afecta grandemente.
“Nos por a mira cu a dicidi di elimina toque de queda y tambe Prome Minister a dicidi di elimina e ‘gebiedsverbod’ na beach y riba rif pero e prohibicion aki pa acumulacion di hende, ta keda vigente pa terenonan publico.
Un decision cu sin duda ta hopi confuso ya cu otro palabra por tin actividadnan publico riba beach y rif pero no riba tereno publico y ora cu nos mira si a habri caminda pa nos hobennan haci deporte libremente, esaki lo no ta e caso y nan ta wordo limita sin tuma na consideracion e importancia cu deporte ta hunga den desaroyo di nos hobennan.
Mayornan y fantaiconan cu ta bay mira un wega di futbol ta keda limit ana 60 persona mientras cu deporte na e momentonan aki tin mester di sosten di tur hende, tin mester di crea fondo pa no solamente cubri gasto di uniform y otro gastonan pero pa sobrevivencia di hopi organisacion.
Clubnan di bala normalmente ta organisa diferente torneo den fin di siman pa recauda fondo, pa haya placa pa nan por sigui draai y percura pa nos hobennan lo por tin forma di haya uniforma nobo, material pa train caminda semper esaki tabata un forma pa organisacionnan deportivo yega na fondonan necesario.
Esey no por ainda pero si por mira con un Minister di deporte demisionario, ta pronkia tur siman cu gobierno a logra di raspa un of otro tereno, kitando yerba cu a acumula mientras cu tur probabilidad, e terenonan aki lo ta yen di yerba den algun dia atrobe.
Deporte cu ta masha esencial pa nos hobennan keda ocupa, pa nan haya algo di haci den un tempo cu no tabatin casi ningun actividad sano na cual nan por a participa, ainda ta keda bou di un presion increibel pa un gobierno cu realmente no ta mira e importancia pa clubnan deportibo cuminsa draai manera mester ta.
Ta increibel con gobierno ta acepta pa por tin actividad cu presencia di hopi hende riba beach of rif, caminda den pasado varios di e brotenan di e virus a tuma luga na fiesta of otro actividnan social, mientras cu nunca a keda comproba cu na un actividad deporte, a surgi un brote di e virus aki.
Un biaha mas e gobierno aki ta confirma cu e no tin nocion di loke e ta haci, con e tin cu haci cosnan pa sirbi interes di nos hobennan y deporte cu ta asina importante pa nos mucha- y hobennan haya algo sano pa haci, tin cu bolbe sinta warda te ora cu e gobiero aki mira e importancia di deporte pa nos hobennan,” Parlamentario Marlon Sneek a declara.
