Nelson Oduber a conseha coalicion pa baha y bay eleccion nobo si no tin sosten!
Aruba,December 17,2018: Durante tratamento di Presupuesto e siman cu a pasa nos tur tabata testigo di un impasse cu a tuma luga entre e Partidonan di coalicion na mando. Parlamentario Arthur Dowers a duna di conoce cu caminda falta di conocemento y mas cu tur cos falta di experiencia den un grupo di persona cu ta yama nan mes Gobernante y personanan cu ta sostene gobierno a resalta. Nunca por a imagina cu bo tin un gobierno cu tin 12 asiento, ta sali bisa cu nan no ta un gobierno cu a bin hunto paso nan ta stima otro pero a resulta cu nan a bin hunto pa nan cumbiniencia personal. Segun nos por a compronde di Ricardo Croes e la bisa cu ta Gobernador a forse drenta den e cos aki, pero na momento cu e la drenta e la bay wak con e por probecha y kico e por logra pa su mes. Cada un riba nan riba nan mes a cera un pacto diabolico pa asina ey nan bay castiga e pueblo.
Bo tin e Gobernantenan aki cu no tin e nivel cu bo mester tin pa bo por guia un Pais. Bo tin hendenan cu a bin haya tur plan cla. Diferente ministernan cu a bin den parlamento cu te na e momentonan aki no por a presenta un plan, no por a presenta ni resultado di loke nan mes a haci, y unicamente ta ehecutando plan di gobierno anterior y trahando conforme loke gobierno anterior a pone. No solamente cu nan a haya tur plan cla, gobernando y cumpliendo cu e trabounan cu AVP a laga, pero awo ta resulta cu nan kier pa Partido AVP goberna tambe pa nan. Tristo!
Coalicion a laga sa cu ta AVP mester ta den parlamento pa dirigi reunion, nos mester ta den parlamento pa duna quorum pa reunion y nos mester percura pa nan gobierno keda cu mayoria. Acaso nan tin un idea kico Gobernacion kiermen, Dowers ta puntra.
Teniendo cuenta cu Nelson Orlando Oduber, un di e personanan cu mas experiencia den hiba oposicion den e pais akinan, a bisa e parlamentarionan aki un aña pasa, cu nan kier sa cu nan ta gobierno na momento cu nan a presenta mas di 100 mocion, a duna nan un lastra y por a mira e biaha aki un diferencia paso no a bin cu mes un cantidad. E aña aki e la bisa nan, tende shonnan si boso no tin sosten di parlamento anto boso mester baha boso gobierno y bay eleccion y pidi Pueblo sosten di 11/12 pa goberna of mester wak si pueblo a cansa di nan.
Arthur Dowers ta finalisa bisando, si e Coalicion aki tin poco tino nan lo scucha ora un di e djaca bieunan aki ta consehonan. Algun di e hendenan den e partido ta kere cu nan rol ta fungi como Cheerleader, rol di shishi, cana haci shisheria enbes di concentra sinta sostene nan gobierno, ta critico pero para tras di bo gobierno pa nan por goberna na interes di e pueblo.
###
