Promer cu sali pa Bermuda y Belize caminda ExPromer Minister Mike Eman ta “keynote” speaker na dos conferencia riba energia renobabel e a worde invita dor di Rocky Mountain Institute (RMI) pa forma parti di presentacion di e experiencia den Caribe cu introduccion di Energia Berde na un atendencia grandi di media Americano na Washington D.C.
Eman a papia elocuentemente encuanto e esfuersonan exitoso pa bay over pa 35% di penetracion di energia renobabel den un periodo relativamente cortico di 2009 pa 2017. E prestigioso Rocky Mountain Institute (RMI cu actualmente ta inclui Carbon War Room) – un partner strategico di Aruba durante e periodo ey – a organisa e evento dia 13 di november ultimo pa revisa e progreso cu RMI a haci te awor pa loke ta su Island Energy Program, enfocando riba e esfuersonan pa reconstrui un futuro flexibel y renobabel pa e islanan Caribense cu a keda afecta pa horcannan Irma y Maria y islanan manera Aruba cu a pone un vision grandi nan dilanti pa introduccion di energia renobabel.
Justin Locke, Director di ‘Islands Energy Program’ a yama Mike Eman bonbini na e evento expresando su mes di e siguiente manera. “Ta un placer pa tin ExPromer Minister Mike Eman aki pa comparti cu nos e progreso grandi cu Aruba a haci riba tereno di energia renobabel. E tabata un di e prome lidernan den region pa reconoce e importancia di reduci substancialmente e uso di petroleo fosil den produccion di energia y pone un plan di accion den otro pa logra e meta di bira un dia 100% sostenibel cu Energia Berde.”
E programa di Energia pa Islanan di RMI ta traha pa accelera e transicion di economianan isleño cu ta depende riba petroleo fosil y bay over pa un mix di energia eficiente y renobabel. E meta inmediato di Rocky Mountain Institute ta pa accelera e transicion pa energia renobabel den 13 pais/isla Caribense, instala 95 megawatts di energia renobabel y yega na forma pa financia e proyectonan di energia aki.
Aruba tabata e prome isla cu a participa den un programa conhunto cu RMI – ora el a wordo lansa originalmente door di Carbon War Room na 2012 – y exPromer Minister Mike Eman a resalta di biaha como un lider cu a pone su alma y curason den e meta noble aki. Aruba, su empresanan di utlidad, Utilities Aruba N.V., WEB y Elmar y Ex Promer Minister Mike Eman a bira un inspiracion grandi pa otronan den region pa haci e transicion pa energia renobabel. Hopi isla ta hacienda e ehercicio aki awor despues di danjonan devastador na nan isla y systema di energia. Eman a splica cu “Aruba danki Dios ta pafo di e faha di horcan” pero a base di un vision mas grandi pa un mihor calidad di bida a pone un trajecto di sostenibilidad central den su periodonan di gobernacion.
