Dialuna anochi exProme Minister Mike Eman a dirigi su mes na pueblo di Aruba, dunando apoyo na e lucha grandi cu henter pueblo ta hibando den ultimo simannan, relaciona cu e brote di e corona virus riba e isla y su efectonan riba bienestar di nos isla.
“Aruba y mundo ta compartiendo un angustia profundo pa e salud di nos poblacion frente un virus grave cu ta plamando y contagiando c’un rapides espantoso. Rond mundo corona virus ta lagando den su rastro malestar y ta cobrando bida di miles di sernan humano. Un virus pa cual ainda no tin vacuna pa proteha nos di dje, caminda Aruba ta conta caba ya cu mas di 50 caso di conciudadanonan cu nan salud afecta pa e virus aki y mustra cu tur ta tur dia den nos oracion.
“Den dianan aki mi a papia y reflecciona cu nos Gobernador Boekhoudt y tambe cu nos ex Gobernadornan Olindo Koolman y Fredis Refunjol riba gravedad cu nos Pais y Pueblo ta bibando. Mi a consulta cu nan pasobra nos ta den un emergencia nacional. Nos ta den un crisis sin precedente, cu ta cambiando nos bida traumaticamente di dia pa anochi. Un situacion di emergencia nacional pa nos salud y di efecto profundo riba e bienestar di nos comunidad. Tur hende ta sufri,”
ExPromer Minister Mike Eman a sigui mustra cu nos pueblo ta sufri e concecuencia di un malesa grave, esunnan cu no ta malo ta sinti tristesa pa otro y tin mas dolor. E angustia aki ta bin cu incertidumbe combina cu e realidad penoso di un situacion socio-economico totalmente paralisa cu perdida masal di trabao, entrada y ceramento di empresanan rond Aruba.
“Sinembargo mes grave y penoso cu e situacion ta, mes profundo, serio y huicioso nos respuesta mester ta pa nos por supera e menasa pa nos salud y e daño grandi cu e ta laga den su rastro. Nos pasonan mester por apela riba contribucion di un y tur pa nos por cuida salud di nos ciudadania y pa nos por crea un plataforma nacional pa rescata nos desaroyo socio economico pa futuro.
Mas cu nunca nos mester ta uni, cla, habri y honesto den nos mission y den destino final.”
Sr Eman a reflecciona riba kico tur hende por haci, y a pidi pa wak rond y tur hende lo por mira cerca tur esunnan cu nan ta stima, mustrando cu riba e isla aki nan a nace of riba e isla aki nan a biba, tanto esunnan cu a bai dilanti y esunnan cu ta cu nos awe.
“Lo mi tabatin gana di bishita boso den e momento aki, wak boso den boso wowo. Duna cada un di boso un caluroso abrazo consulador. Pero esey no por awor, no mag awor.
Nos calor pa otro nos tin cu exprece den un otro forma na momento aki, huicioso y cauteloso pa nos cuida otro. E no ta facil, pero hopi necesario awor. Ban sigui e reglanan cu autoridadnan y expertonan di salud ta comparti cu nos. Wak rond di bo ken mester di ajudo. Ban cuida otro, juda otro y especialmente esnan mas vulnerabel. Comparti e tareanan diario necesario, di compra of otro, pa nos tene mas hopi posibel nos hendenan na cas,” sr Eman a trece dilanti.
Ta tuma un crisis di e magnitud di corona-virus, pa realisa cu uni e pais ta fuerte y dividi e pais lo ta perdi, y cu nos ta rondona cu tur nos sernan stima.
“Mas cu nunca nan salud y bida ta depende di nos. Locual nos haci of no haci por causa cu un mama di nos, un abuelo di nos, un ruman, un bon amigo por bira malo, por bira hopi malo, por hasta perde su bida.
Ban mustra esnan cu ta para dilanti na e linea di bataya, nos dokternan, nos enferameranan, nos profesionalnan di departamento di salud, tur cu ta laga nos institutonan di cuido funciona, di esnan den limpiesa te cu e specialista, ban mustra nan cu nos ta aprecia y gradicido pa locual nan ta hacienda cu nos presencia y disciplina pa keda paden.
Nan tey eyfor hunto cu nos polisnan y promernan di asistencia haciendo e trabao grandi pa pueblo por ta paden sigur, sano y salvo,” ExPromer Minister a invatisa den gratitud pa e trabao cu nos promer linea ta desplegando y pueblo su aporte cu pasenshi y voluntad pa accepta incovinencia judando pa keda paden.
