Cu un eloquencia impactante exPromer Minister Mike Eman a acapara mente y curason di e audiencia presente na e Forum riba energia renobabel na Bermuda. Un mensahe cu a acopla e logronan technologico di Aruba riba e tereno di introduccion di energia renobabel cu un vision mas grandi pa realisa un mihor calidad di bida pa un y tur a duna e discurso di Eman e substancia y e calor humano cu a impacta e sala completo di e conferencia.
Minister di “Home Affairs and Energy”, Honorable Walter Roban y e Director di Departamento di Energia di Bermuda, Jeane Nicolai, a jama nan kenote speaker, Ex Promer Minister Mike Eman bon bini cu hopi palabra di elogio pa su liderazgo cu a inspira henter Caribe riba e tema di energia renobabel y sustenibilidad. Nan ta mira liderazgo di Eman riba e tema aki di gran valor pa Small Island Development States (SIDS).
Promer cu e keynote di exPromer Minister Eman esnan presente a haya un video mira di tur e projectonan cu Aruba a realisa riba tereno di introduccion di energia renobabel, parke di molina di biento, parkenan solar, instalacionnan solar riba edificionan di gobierno, MFA y schoolnan, innovacion y modernisacion pa mehora eficiencia na WEB y Elmar, envolvimiento y participacion di comunidad, maneho consistente y coherente pa haci e pensamento di energia renobabel ta parti di tur generacion ariba e isla.
ExPromer Minister Mike Eman a mustra cu e vision aki ta parti di un vision mas amplio cu ta acopla na e objetivo mas grandi pa realisa un mihor calidad di bida pa tur ciudadano di Aruba. E a mustra cu despues di algun decada di crecemento economico basa riba expansion di turismo a bira hopi cla cu tabata crece un gap entre e progreso economico macro y e realidad socio-economico di ciudadanonan di Aruba. Eman a splica cu mientras nos tabata haya un hotel di 5 strea tras di otro, nos no por a bisa mescos pa cu e distribucion di entrada y bienestar den nos Pais. Pesey a tuma e posicion cu no kier unicamente hotel di 5 strea, pero nos kier schoolnan di 5 strea pa nos muchanan, servicio di 5 strea pa nos comuidad den nan areanan residencial, nos kier barionan di 5 strea, hospital di 5 strea. Tambe e expansion hotelero aki ta bai a costo di nos playanan, naturalesa, flor y fauna y hopi ves e trankilidad y identidad di nos Pais.
Pesey Eman a enfoca riba un maneho pa reparti mas hustamente e entrada den Pais. Un maneho tambe pa eleva e calidad di bida di mas hopi ciudadano posibel. Esaki cu renobacion di barionan, renobacion di schoolnan, restauracion di monumentonan, renobacion di centronan di ciudad. Edificionan multifunccional pa mihor servicio den barionan. Canchanan deportivo pa hobennan. Hospital nobo. Infrastructura moderno, waf di container nobo, careteranan nobo cu embeyecimento di areanan entre caminda y e casnan. Un vision completo pa trece mehoracion di calidad di bida den tur skina di e isla. Eman a splica tambe cu e proceso aki a cana man den man cu consulta cu pueblo, barionan, dialogo social. Tur e principionan y pilaarnan di kico ta haci un desaroyo sostenibel a worde aplica den e proceso y realisacion di e metanan grandi aki.
Tambe Eman a splica cu na e mesun momento a conecta e vision aki na e desaroyo di un pilaar economico nobo basa riba conocemento. A splica con den e cuadra aki a busca tambe pa haya un cooperacion di win-win cu madre patria. Basa riba esaki a trece institutonan manera TNO, Philips, Scheepvaartschool Rotterdam, Qredits, Port Amsterdam, innovacion cu Schiphol, Rietveld academie. Tur pa por realisa multiple meta cu e vision di sostenibilidad cu Aruba a carga.
Eman a bisa di a realisa cu hopi a y lo sigui mira e metanan aki como mucho ambicioso. Den e cuadra aki e a cita Presidente John F. Kennedy na momento cu a anuncia su ambicion pa Merca por yega luna: “Wechoose to go to the Moon in this decade and do the other thing , not because they are easy, but because they are hard; because that goal will serve to organize and measure the best of our energies and skills, because that challenge is one that we are willing to accept, one we are unwilling to postpone”.
Finalmente Ex Promer Minister Mike Eman a splica cu e vision cu accento riba calidad di bida pa e pueblo a haya tambe su resonante den nos bista riba desaroyo di nos isla pa cu turismo. Si antes nos tabata pone e accento riba un isla bunita pa bishita, awor nos a acopla e bunitesa aki na un desaroyo mas equilibra enfocando cu “un isla dushi pa nos biba ta un isla dushi pa bishita”. Asina nos por comparti un curason alegre y satisfecho cu esnan cu ta bishita nos, pasobra nos ta duna e atencion mereci na e calidad di bida di nos hendenan, e a termina bisando na un sala completamente den admiracion pa e eloquencia y profundidad di su palabranan.
