“Esaki ta un gobierno sin curason, celebro y alma, locual ta traduci su mes penosamente pa nos pueblo den un gobernacion sin sentimento, sin conocemento y sin consenshi” asina e lider di oposicion mr. Mike Eman a cualifica e Gabinete di Evelyne Wever Croes e siman aki. Den bista di tur e acontecimentonan penoso, turbulento y tragico den nos Pais, cu ta worde relata directamente na e ambiente di dolor, desesperacion y depresion nacional, cu Evelyne Wever Croes a crea den nos Pais, cu un maneho devastador pa e hogarnan na Aruba, e lider di fraccion di AVP, mr. Mike Eman a expresa su mes cu hopi preocupacion, sentimiento y substancia. Cu cifranan cu ta confirma e crisis den hogarnan na Aruba, Eman ta mustra riba e desaroyo penoso den nos comunidad.
SIN CAPACIDAD
“Evelyne Wever Croes y su coleganan no ta cana den pueblo pa sinti y scucha e dolor, anto lo bo a spera cu alomenos cu nan lo por a lesa e rapportnan di institutonan manera Centrale Bank van Aruba (CBA) y di Centraal Bureau Staistieken (CBS) voor Aruba”, Eman ta declara. Cu “dos placa di sinti” lo nan a compronde for di e rapportnan aki cu nan maneho ta creando placa pa caha di gobierno, pero ta creando pobresa den pueblo. Gabinete Wever Croes cu un entrada miyonario extra, pero cu pueblo no ta mira ningun caminda. Mr. Mike Eman ta cita con Banco Central den su rapport “State of the Economy, First Quarter of 2023” ta mustra riba mas di 88 miyon extra na entrada den promer kwartaal di anja 2023 cu practicamente ta worde absorba dor di un BURACO MISTERIOSO. E extra “government revenu” chica for di pueblo, na medida, ta worde mitiga atrobe, según CBA, dor di “higher government expenditure”. Unda e miyones nan aki ta bai ningun hende sa, pasobra e supuesto debe no ta baha y pueblo no ta mira nada bek pa su amargura y sufrimento na man di medidanan di Evelyne Wever Croes. Eman ta cita CBA: “During the first quarter of 2023, the GoA recorded a financial surplus of Afl. 16.9 million. A year before, the GoA ran a deficit of Afl. 52.0 million. This turnaround was completely driven by a jump of Afl. 88.0 million in revenues, which was partly mitigated by higher government expenditures. The latter rose by Afl. 20.2 million (Q1 2023 vs. Q1 2022).
SIN CURASON
Cu Evelyne Wever Croes y su coleganan no tin curason ta keda prueba pa e realidad doloroso di aumento di costo di bida cu ta directamente e consequencia di nan maneho. E cifranan di CBS pa locual ta trata inflacion ta mustra con costo bida ta worde aumenta pa e dicisionnan cu Evelyne Wever Croes y su coleganan a tuma. No unicamente e cifra astronomico di aumento general di prijs cu 6% atrobe, pero si mira con e componente di cuminda, electricidad y awa a subi, cu ta pisa mas pisa ainda den e presupuesto di esnan di menos recurso, anto ta bira cla con e decisionnan directo di Evelyne Wever Croes y su gobierno ta causa di tur e sufrimento den pueblo. CBS ta mustra cu cuminda a subi cu 11.2%, electricidad cu 19.4% y awa cu 21.1%. “Si bo conoce e prespuesto di un famia di menos recurso lo bo mester ta un persona “sin curason” pa no sinti cu e componentenan “cuminda, electricidad y awa” ta esunnan cu mas ta pisa y ta causando e pobresa grandi na Aruba”. Y esakinan ta hustamente e componentenan basico cu maneho directo di Evelyne Wever Croes a causa.
SIN CONSENSHI
Atrobe unda e consenshi di un gobierno ta keda cu ta tuma medida severo y formalmente ta laga e fraccion di AVP sa den documentonan di Paralmento “cu nan no a haci onderzoek di e consecuencia di nan medidanan”. Anto no por yega na ningun otro conclusion, según e lider di oposicion, mr. Mike Eman cu Evelyne Wever Croes y su coleganan no tin consenshi tampoco. “No unicamente nan no ta haci onderzoek delanta di e consecuencianan di nan medidanan, pero tampoco nan tin un consenshi cu ta bisa nan laga nos alomenos lesa e raportnan di institutonan manera CBA y CBS cu por bisa nos kico ta pasando den pueblo, ya cu nan mes ta sordo y ciego pa e dolor di pueblo”, Eman ta accentua. “Nos ta mire tur dia den pueblo y si Evelyne Wever Croes no kier scuche dimi lagami cite pe for di e cifranan mas recien di CBS cu ta bisa cu un persona di salario minimo tin un deficit 648 florin pa luna”, Eman ta expresa. E ta cita CBS: “In June 2023 the subsistence level for a single adult household is Afl. 2,541, which represents an income deficit of Afl. 648, an increase of Afl. 49 compared to the deficit observed one year ago (Afl. 599). This deficit is the highest registered over a period of six years for the month June”.
CAMBIO HUSTO: BON COMUN
E conclusion no por ta nada otro cu Evelyne Wever Croes y su gobernantenan ta sin curason, celebro y alma. Pueblo ta sufriendo pa causa di nan maneho. 1.5 biyon extra na entrada den cinco anja nan a ranca for di saco di pueblo, pero e supuesto debe cu nan ta paga no ta baha y Aruba tur dia ta bira mas deteriora atrobe, tanto fysicamente como socialmente. E demanda urgente pa solucionan di problemanan cu ta kibrando nos sociedad for di otro, manera pobresa, e inhusticia social, insiguridad, e soledad depresivo bao hoben y grandi, desiqualdad, falta di perspectiva, tur causa pa un maneho sin curason, celebro y consenshi, mester di un CAMBIO HUSTO. Eman ta bisa cu unicamente un CAMBIO HUSTO di direccion por salba nos pueblo. “Ni MEP, ni FLY BY NIGHTS, pero un gobierno cu curason, celebro y alma cu lo pone e BON COMUN como e strea di orientacion atrobe, pa sirbi comunidad henter, no “friends and family” y tampoco “interesnan particular”, pero sirbi henter nos Pueblo y henter nos Pais, cu capacidad, amor y stimacion lo trece un CAMBIO HUSTO, e lider di fraccion di AVP, mr. Mike Eman, a enfatisa.
