Autonomia di Aruba ta importante pa combati pobresa, mehora empleo y aumenta poder di compra. Ta hustamente e autonomia ey Evelyn Wever-Croes a entrega na momento cu el a firma e acuerdo cu Hulanda riba dia 13 di november 2020, asina, Parlamentario Santos do Nascimento ta afirma.

E ta basa su mes cu Wever-Croes a gaña cu e lo traha pa ‘un autonomia mas fuerte’. El a bolbe gaña nos den su discurso di fin di aña cu ‘2021 lo ta un miho aña’ pa un ‘autonomia mas fuerte’ (wak su mensahe di cambio di aña: https://m.facebook.com/MinPresAruba/videos/185769739949688/).

Atrobe e ta gaña ora e ta sugeri cu e onderlinge regeling ta sirbi nos autonomia. Loke e no ta bisa ta cu e asunto primordial no ta si ta bin un Rijkswet of un “onderlinge regeling”; e asunto primordial ta e Landspakket, pasobra ta e Landspakket ta expresa cu Hulanda mester goberna nos asunto interno hunto cu nos. P’esey, tanto Knops como Van Huffelen a confirma cu e onderlinge regeling no ta trece ningun cambio den e contenido di e exigencianan di reforma.

Santos do Nascimento: “Desde un principio AVP tabata contra CHE/COHO y henter e manera cu gobierno di Hulanda y di Aruba a deal cu otro. AVP a enfatisa cu mester negocia di nobo cu Hulanda.”

E motibonan ta: (1) cu e manera autoritario cu gobierno di Hulanda a trata Aruba durante pandemia a haci hopi daño na e confiansa entre Hulanda y Aruba, (2) e structura di CHE tabata viola e responsabilidad di pueblo di Aruba pa atende cu su propio destino y (3) e campaña di reforma di Hulanda ta perde for di bista e importancia di un maneho cu ta conduci na un bida digno pa cada ciudadano (seguridad di existencia/ bestaanszekerheid).

E parlamentario y academico constitucional ta splica cu e documento mas halto den Reino, e Statuut voor het Koninkrijk der Nederlanden, ta stipula cu asunto di Reino (articulo 3 y 43) ta asunto cu solamente e gobierno di Reino y e legislador di Reino tin mag di regla. Tur otro asunto hunto ta forma nos autonomia (articulo 41 Statuut). 

Cu otro palabra, nos finanzas publico, nos economia y turismo, nos cuido medico, enseñansa, asuntonan social y nos husticia tur ta un asunto interno di e Pais Aruba. Evelyn Wever-Croes nunca ta splica pueblo cu 13 di november 2020 el a entrega hustamente e asuntonan aki na Hulanda. 

Hulanda a propone un ‘integrale aanpak’ pa cu cuater ‘themagebieden: I. Overheid en financiën, II. Economische hervormingen, III. Zorg en onderwijs, IV. Versterken rechtsstaat.’ Landspakket ta cubri cada area cu, segun Statuut, ta un asunto interno. “Si señora Evelyn a lesa e acuerdo cu Hulanda cu e mes a firma dia 13 di november 2020, e lo tabata sa cu na aña 2021 Aruba lo wordo presenta cu un plan Hulandes cu ta manca esencia di nos democracia y autonomia,” e parlamentario ta indica.

Y ta door cu el a lese, cu e tabata bon na altura di e contenido y cu esaki no lo cay den bon tera, el a bypass parlamento y constitucion caba riba dia 13 di november 2020. Danki na Raad van State cu nos a resta un tiki di nos dignidad como pueblo (URL: https://www.raadvanstate.nl/@123232/w04-20-0408/).

“Evelyn Wever-Croes kier scapa cara poniendo bo kere cu e onderlinge regeling ta un logro grandi. E tristo realidad ta cu señora Evelyn ta tapa e berdad cu el a entrega autonomia caba. Pio ainda ta cu e maneho ancra den Landspakket ta hiba Aruba riba un rumbo di medida, opresion y pobresa,”asina e parlamentario ta finalisa bisando.