Ta otro inhusticia contra comunidad di parti di Prome Minister Evelyn Wever Croes, ora cu diahuebs mainta el a presenta den Parlamento caminda a trata e cambio di ley nobo pa loke ta reparticion di ministerionan, apesar cu Raad van Advies a conseha su persona pa tira e ley aki afo.
Parlamentario Arthur Dowers a mustra cu apesar di e conseho aki di RdA pa no implementa e cambionan den e ley ya cu nan no ta sirbi interes general, caminda den pasado caba e propio Minister Presidente ayega di sigura pueblo cu su gobierno lo bay traha cu solamente 7 minister.
“E tempo ey e lider di MEP a mustra cu reduccion di carteranan di minister te na shete, ta pone cu gobierno di Aruba lo scapa un gasto di 50 miyon florin pero awor un biaha mas Evelyn Wever Croes ta presenta un concepto di cambio di LIM, cu ta consisti di un total di 8 minister.
Pues tur locual el a priminti den pasado di lo yuda reduci gasto di persona di gobierno cu 50 miyon florin, awor atrobe e ta bolbe presenta un LIM cu ta consisti di 8 minister pero di otro banda si e mesun persona aki ta bira impone un medida di 12.6% riba salario di trahadonan publico, sin consulta cu e trahadonan.
Un cambio di ley di LIM sin hustificacion ya cu Raad van Advies a mustra e Prome Minister cu e proposicion cu a wordo presenta den e cambio di ley aki, ta mustra cu e dos ministernan di partido RAIZm ta representa 6% di e presupuesto total pa 2022, lagando e ministernan di partido MEP cu e resto di 94% den e presupuesto cu ainda no a yega Parlamento pa wordo trata.
Ta di spera cu esunnan cu den e proceso electoral di 2021 a vota pa partido RAIZ, ta consciente cu nan partido cu e reparticion di ministerionan, a wordo transforma den un simpel satelite di partido MEP.
Practicamente ta keda confirma den e reunion di cambio di ley di LIM, cu apesar cu Ursell Arends y Geoffrey Wever tin titulonan di minister y ta cobra mesun salario di ministernan, nan a ser converti den satelitenan di partido MEP, sin mucho poder y sin mucho di bisa den e gobierno aki.
Pa colmo na un momento cu gabinete Wever Croes a dicidi di impone medida riba salario y beneficionan di trahadonan publico, rancando placa for di nan cartera, a spera y nos ta kere cu Raad van Advies tambe a spera esaki mirando nan reaccion riba e cambionan presenta, cu gobierno loa presenta un gabinete cu solamente seis of shete minister.
Mirando con e lider di MEP a reparti e ministerionan den e ley cu a wordo presenta diahuebs maina, por mira claramente cu e falta di conocemento politico, e falta di madures politico, ta hungando un rol crucial den e cambionan proponi.
Den henter e presupuesto, e dos ministerionan cu RAIZ a acepta pa maneha, ta representa apenas un 6% di e totalidad di presupuesto, loke ta mustra cu ministernan di RAIZ lo no tni placa pa haci net nada pa sirbi interes di pais Aruba.
Tempo cu Premier Wever Croes a bisa den pasado cu trahando c’un gabinete di 7 minister, lo pone gobierno spaar 50 miyon florin riba gasto di personal, un suma cu ta practicametne ta casi igual na loke ta gobierno ta rancando for di cuido medico den AZV, cual reduccion tin cu yega te na 60 miyon florin pa aña,” Parlamentario Arthur Dowers a declara.
