Durante conferencia di prensa partido y fraccion di AVP, parlamentario Mervin Wyatt-Ras a elabora encuanto e Ley di Ombudsman of Defensor di Pueblo y a coregi loke sra. Evelyna Wever Croes kier ganja pueblo. E sra. aki den su entrevista a haci comosifuera cu fraccion di AVP no a bai di acuerdo cu e ley di Ombudsman of ta hasta contra. E ta asina cu e sra. aki, Evelyn Wever Croes, ta maestro den ganja. Mervin ta splica cu no ta e ley di Ombudsman a keda trata sino e cambio di nos Constitucion cu ta ancra e ley di Ombudsman. E cambio di nos Constitucion lo yuda haci cu e Ombudsman ta ser reconci como un colegio halto y independiente. E ley di Ombudsman mes a wordo aproba ya caba na september di anja 2020. E ley aki a cana un trajecto desde anja 2013 den un comision parlamentario. El a cana su caminda y el a wordo aproba den Parlamento den forma unanime cu mayoria absoluto.
E Ombudsman ta un persona of entidad independiente cu na momento cu un persona acudi pa un servicio na un instancia gubernamental, semi-gubernamental, of “privaatrechtelijk” (manera un fundacion), y e no wordo trata bon e por aserca un Ombudsman y e Ombudsman por haci un investigacion y zorg cu e persona ta wordo “goed bejegend” of bon trata. E Ombudsman ta haci investigacion independiente y si ta necesario e por intermedia. E tin un rol preventivo tambe. Na momento cu e sinti cu tin algo cu no ta bayendo bon den un instancia e por intermedia pa e cliente haya su servicio, manera cu mester ta. Esey seguramente lo zorg cu e servicio lo bira mas efficiënte, cu tin menos fraude, pasobra e persona di Ombudsman lo ta eynan y cu wowonan hancho habri riba e situacion aki. Tambe Parlamento a aproba un Kinderombudsman. Importante ta pa nos muchanan tambe tin un persona cu na momento cu instancianan no ta atende un mayor of hoben, e por aserca e Kinderombudsman pa por cuestiona of yuda e instancia pa e duna e servicio/ayudo adecuado cualitativo.
Nos fraccion no a aproba e cambionan proponi den nos Constitucion. Pakico no? Pasobra den e cambionan aki gobierno a hinca hopi punto cu nos fraccion no por a bai di acuerdo cu nan.
Gobierno kier regla den nos Constitucion cu ta laga Parlamento afo na momento cu ta nombra e minister presidente y minsters. Normalmente ta consulta cu Parlamento. A base di articulo II.2 inciso 1 gobierno kier laga esey afo. Nos fraccion a mustra claramente cu nos no ta di acuerdo paso esey ta mina e control di Parlamento riba gobierno.
Tambe nos a entrega un amienda pa loke ta trata e retiro di Ombudsman. Pa bo nombra un Ombudsman mester di aprobacion di dos tercera parti di e cantidad di miembronan di Parlamento. Sinembargo pa su retiro mester mayoria voto so. Nos fraccion no ta di acuerdo. Mirando e situacion actual, mirando cu e gobierno aki ta favorece blo friends and family, mirando cu e gobierno aki ta kita directornan di diferente departamento of entidadnan paso nan no gusta nan of nan no ta haci kico gobierno kier, tin cu proteha e funcion di Ombudsman. Ehempelnan ta NV Elmar , Web NV, Utilities, AZV, te hasta director di hospital. Awor aki hasta a pone un banda un sra. cu ta conoci como un persona integro kende ta directora di DIMAS. Gobierno a pone e tambe un banda. Abase di e proceder aki, mayan si un Ombudsman/Kinderombudsman ta critico cu gobierno, y ta cuestiona gobierno, e tambe tin chens di wordo kita zomaar cu aprobacion di stempel Parlement cu lo haci kico gobierno kier. Nos fraccion kier preveni esaki. Tin coleganan a bisa cu kier haci e Ombudsman MEP-proof, pero ta masbien pa asina por garantisa cu e Ombudsman aki no matter what e por haci su trabou y esey fraccion di AVP a trece den un amienda den cual mester tin dos tercera parti pa por retira e Ombudsman.
Un otro amienda cu nos fraccion a presenta ta esun di e un Begrotingskamer. Na e momentonan aki Aruba ta bou curatela di COHO. Si nos un dia kier tin nos autonomia nos mester tin nos asuntonan financiero na ordo y awor ta momento pa regla esaki den Constitucion cu ya ta ser cambia. Lamentablemente e fraccionnan cu ta sostene gobierno no a sostene locual nos como fraccion a presenta y a skohe pa haci politikeria cu asuntonan serio. E ta un “gemiste kans” y Wyatt-Ras ta spera cu gobierno refleha y drecha e ley pa mas pronto cu ta posibel bin bek parlamento cu un “gewijzigde versie” cu si lo por ser aproba den Parlamento.
No ta na su lugar pa Wever-Croes keda acusa oposicion. E boluntad mester ta di gobierno tambe y e presidente di parlamento pa delibera cu partidonan.
Pero ta skohe hasta pa ganja cu nos fraccion no a vota pa e ley di ombudsman. E kier get away with murder pero ta bon pa tur hende sa for once and for all cu e ley di Ombudsman ta pasa dia bieuw y ta solamente e Constitucion mester ser cambia y dor cu gobierno a pone diferente punto cu ni ta pertenece na Ombudsman e ley di nos Constitucion no por a ser pasa sin menciona a e un fora arogante di no solamente Evelyn-Wever Croes y su grupito, pero tambe di e presidente di Parlamento cu no ta cumpli cu su tarea manera mester ta di un presidente di parlamento cu mester ta un vocero di henter parlamento pa trece fraccionnan hunto pero no por esey y ta mas bien polarisa. El a bai den prensa y anuncia di antemano cu e no lo sostene locual oposicion lo bin cun’e. Ta keda si cu mester bin cambio den e ley di nos Constitution y cu gobierno mester bin bek Parlamento cu un ley adapta.
